Kombëtarja shqiptare u ndal në barazim mbrëmjen e djeshme ndaj Letonisë me shifrat 1-1 në transfertë.
Shanset e kuqezinjve për të shkuar në Botërorin e vitit 2026 janë pakësuar pas barazimit të dytë radhazi, pas atij ndaj Serbisë në ‘Air Albania’.
Në një intervistë për ‘GazetaBlic Sport’, ish futbollisti i Kombëtares së Shqipërisë, Rudi Vata, tha se dështimi rrjedhë nga sistemi i krijuar tek FSHF.
“Sistemin e kanë ndërtuar njerëzit që përfaqësojnë institucionin e futbollit. Sistemi i rregullon dhe sistemi i shkatërron. Amatorët nuk munden kurrë të ndërtojnë një sistem profesionist, kurrë sepse janë amatorë”, tha fillimisht Vata.
Tutje, ai u pyet se a e ka këtë aludim për Armand Dukën, ndërsa ai tha se nuk po aludon, por po flet direkt, duke shtuar se Shqipëria historikisht ka prodhuar diktatorë dhe jo shërbëtorë të vendit.
“Unë nuk po aludoj, por po flas direkt, Shqipëria historikisht ka prodhuar diktatorë dhe jo shërbëtorë për t’i shërbyer kombit dhe popullit në mënyrë njerëzore“, vazhdoi me deklarimin e tij, Vata.
Krejt në fund, ai u pyet edhe për trajnerin Sylvinho dhe shkarimin e tij të mundshëm nga posti i trajnerit tek Kombëtarja e Shqipërisë.
“Sylvinho po gabon në momente të rëndësishme, ashtu siç mund të gabojë çdo trajner. Sylvinhon e ka zgjedhur sistemi, sepse ka besuar që ai mund të bëjë hapin tjetër për Kampionatin Botëror. Kur dështon sistemi, dështon edhe trajneri“, përfundoi Vata për ‘GazetaBlic Sport’.
