Pas një rrugëtimi të gjatë dhe të paharrueshëm që zgjati plot 25 vite, legjenda e futbollit mitrovicas, Shpëtim Idrizi, ka njoftuar largimin nga klubi i Trepça ’89. Si ish-lojtar dhe trajner, ai ka qenë një nga figurat kyçe që kanë ndikuar në sukseset dhe zhvillimin e klubit ndër vite.
Në një postim Idrizi ka shprehur mirënjohjen për të gjithë ata që e kanë shoqëruar në këtë rrugëtim të gjatë, duke veçuar me respekt dhe falënderim presidentin e klubit, Abedin Zeka – Beki, si dhe drejtorin Arsim Islami, për besimin dhe përkrahjen e palëkundur.
“Ky klub për mua ka qenë më shumë se një punë – ka qenë familje. Largohem me kokën lart, i mbushur me kujtime dhe krenari për gjithçka që kemi arritur së bashku,” ka shkruar Idrizi, duke e përmbyllur mesazhin me fjalët domethënëse: “Rruga vazhdon – Mirupafshim!”
Largimi i tij shënon fundin e një epoke të artë për Trepçën ’89. Kontributi i Shpëtim Idrizit ka lënë gjurmë të thella në historinë e futbollit mitrovicas, ku ai do të mbahet mend gjithmonë si një figurë që e ndërtoi dhe e udhëhoqi klubin me pasion, përkushtim dhe shpirt sportiv.
