Shërbimi Spitalor Klinik dhe Universitar i Kosovës ka dhënë tender prej 3 milionë e 514 mijë e 280 euro e 37 centë, për t’u furnizuar me barna nga lista esenciale.
IndeksOnline raporton se thirrja e tenderit ishte e ndarë në 14 pjesë, sakaq vlera e parashikuar për tender ishte mbi 5.5 milionë euro.
Tenderi i dhënë është për 10 lote, teksa furnizimi parasheh të mbulojë nevojat e të gjithë sistemit spitalor të SHSKUK-së.
Loti me vlerën më të lartë është ai i dhënë për furnizim me erythropoiesis-stimulating agents, medikamente që stimulojnë palcën e eshtrave për të prodhuar më shumë qeliza të kuqe të gjakut. Vlera e këtij loti është 1,707,744.60 euro.
Nga ana tjetër, 469,440 euro janë ndarë në lotin 2, për furnizim me coagulation factor IX, human, që do të shfrytëzohet për trajtimin e hemofilisë B dhe ndërhyrje kirurgjikale, për të parandaluar gjakderdhjen.
SHSKUK-ja ka dhënë 455 mijë e 700 euro në lotin 6 për t’u pajisur me kapsula nilotinib, që përdoret për trajtimin e leukemisë.
Loti 9, që parasheh furnizim me gemcitabine pluhur për injeksion, është dhënë në vlerë prej 335 mijë e 172 eurosh.
SHSKUK-ja po ashtu ka siguruar furnizimin me trastuzumab (Lot 4), pluhur për tretësirë për infuzion, furnizim ky që arrin vlerën prej 187,795 eurosh.
Në lotin 12 janë ndarë 121 mijë e 800 euro për furnizim me pemetrexed, medikament që kryesisht përdoret për të trajtuar kancerin e mushkërive.
Nga ana tjetër, loti i 8 për furnizim me sorafenib është dhënë në vlerë prej 109 mijë e 24 euro e 11 centë, për të siguruar trajtimin e pacientëve që lëngojnë nga kanceri i mëlçisë apo tiroides.
Është dhënë po ashtu kontrata për furnizim me imatinib, e paraparë nga loti 10, e që ka vlerë prej 60,102 eurosh. Ky medikament përdoret kryesisht për trajtim të llojeve të caktuara të kancerit të gjakut dhe tumore të rralla.
Kontrata për lotin 5 u dha në vlerë prej 39 mijë e 973 euro e 26 centë, për t’u pajisur me midazolam, medikament që shfrytëzohet për sedacion dhe hyrje në anestezi të përgjithshme.
Loti me vlerën me të ulët të dhënë është ai i 7-ti, për furnizim me sunitinib.
SHSKUK-ja ka ndarë 27 mijë e 529 euro e 40 centë për t’u furnizuar me këtë medikament, që kryesisht trajton kancerin e veshkave dhe disa tumore specifike.
Të gjitha këto lote janë nënshkruar me kompanitë që ofertuan vlerën më të ulët.
Furnizimi është paraparë të bëhet për 24 muaj.
Detajet mbi tenderin dhe kompanitë përfituese janë të figuruara në dokumentin më poshtë./IndeksOnline/
