Ministria e Mjedisit, Planifikimit Hapësinor dhe Infrastrukturës, ka njoftuar se i ka ndërprerë punën kompanisë vushtrriase “Florenti Trans”, raporton Veriu info.
Sipas njoftimit të ministrisë kompania nuk i ka plotësuar kushtet e pëlqimit mjedisor për tu pajisur me këtë dokument, prandaj edhe është marrë masa e ndalimit të punës.
Njoftimi i plotë:
NJOFTIM
Në vazhdën e përmbushjes së obligimeve ligjore, punëve te planifikuara me plane vjetore si dhe obligimeve të marra nga memorandumi i bashkëpunimit me institucionet si Policia e Kosovës, KPMM, Inspektorati i Agjencisë Pyjore, si dhe inspektoratet komunale, për parandalimin e degradimeve mjedisore dhe aktivitet tjera te jashtëligjshme, me datën 13.03.2023, Inspektorati I MMPHI-së, së bashku me Inspektoratin e KPMM-së dhe Policinë e Kosovës, ka ekzekutuar vendimin për ndërprerje te punëve ndaj kompanisë “Florenti Trans” sh.p.k, bazë Betoni në Vushtrri.
O.E. ka qenë në procedurë për tu pajisur me Leje Mjedisore dhe i njejti, nuk ka plotësuar kushtet e pëlqimit mjedisor për tu pajisur me këtë dokument, prandaj edhe është marrë masa e ndalimit të punës, kështu duke ju vendosur edhe ndalesa përmes shiritave. Kjo ndalesë do të zgjasë derisa i njejti të plotësojë kushtet e dala nga Pëlqimi Mjedisor dhe të pajiset me Leje Mjedisore.
Zbatimi i kësaj mase do të mbikëqyret nga institucionet e cekura si më lartë.
