Pas grevës në arsim edhe Sindikata e Punëtorëve të Sektorit Privat ka paralajmëruar grevë.
Kjo në rast se Qeveria e Kosovës nuk e heq kushtëzimin për subvencionim të 50% të rritjes së pagës, pjesë e pakos së fundit mbështetëse.
Përmes një konference për media, kjo sindikatë kërkoi që qeveria të subvencionojë pagat e sektorit privat për 50 euro,pavarësisht se a i rrisin pagat punëdhënësit.
“Një kërkesë që është e pashmangshme, një kërkesë që nuk guxon të humbë kohë është ajo që qeveria e Kosovës duhet ta heqë kushtëzimin lidhur me kompanitë private. Që nëse kompanitë private i japin 50 euro do t’i japë edhe unë 50 euro”, tha kryetari i sindikatës, Jusuf Azemi.
Azemi tha se nuk duan grevë, por shtoi se kanë presion nga punëtorët, andaj janë të detyruar.
