Në kuadër të hulumtimeve për parregullsitë në sektorin privat të shëndetësisë, Veriu.info ka siguruar një vendim të Inspektoratit Shëndetësor të Ministrisë së Shëndetësisë me të cilin spitali “Samsun Medikal Grup Özel Sağlık Hizmetleri Anonim Şirketi Branch in Kosova” me themelues Himet (Kadri) Cavus, që operon me emrin tregtar “Medical Park”, është gjobitur me 3 mijë euro për shkelje të Ligjit për Shëndetësi.
Në arsyetimin e vendimit të siguruar nga Veriu.info, që mban datën 23 korrik 2025, thuhet se gjatë inspektimit është konstatuar se “Medical Park” ofron pa licencë shërbimin e pulmonologjisë.
Po ashtu, inspektorati ka gjetur edhe staf ilegal në këtë spital, duke zbuluar se se Dr. Violeta Zatriqi – specialiste e kirurgjisë plastike, Dr. Petrit Nuraj – specialist i urologjisë, Dr. Yalcin Karakoca – specliast i pulmologjisë, Dr. Rukije Mehmeti – specialiste e urologjisë, Dr. Fatmire Ymeri – specialiste e gjinekologjisë, Dr. Zana Baftiu – neonatologe, Dr. Mahmut Çakmak – specialist i kardiologjisë, Dr. Lulzim Brovina – specialist i mjekësisë interne, Dr. Burim Imeri – specialist i gjinekologjisë dhe farmacistja Delvere Shabani kanë ofruar shërbime shëndetësore si staf i pa lajmëruar në Divizionin për Licencim dhe Akreditim në Ministrinë e Shëndetësisë.
Skandali i “Medical Park”, i zbuluar nga inspektorët shëndetësorë në korrik 2025, nuk përfundon me kaq, pasi që janë gjetur fakte se Dr. Visar Nushi – specialist i ortopedisë ka ofruar proteza të gjurit, ani pse ky shërbim ishte i pa licencuar në DLA/MSh.
Arsyetimi i vendimit të Inspektoratit Shëndetësor përfundon me konstatimin se spitali i përgjithshëm “Samsun Medikal Grup Özel Sağlık Hizmetleri Anonim Şirketi Branch in Kosova (Medical Park)” nuk ka respektuar ligjin, duke ofruar shërbime shëndetësore të pa licencuara në sistemin DLA/MSh, por edhe duke operuar me staf të pa lajmëruar në DLA/MSh, me ç’rast ka ushtruar veprimtarinë pa përmbushur kushtet nga neni 40 dhe 42 i Ligjit për Shëndetësi.
Veriu.info ka dërguar pyetje në “Medical Park” në lidhje me këtë vendim, ku në përgjigjen e tyre thuhet: “Lidhur me pyetjet tuaja, ju njoftojmë që spitali nuk ka asnjë gjobë të papaguar, që nënkupton se gjoba është paguar. Natyrisht që edhe rekomandimet e Inspektoratit Shëndetësor, të gjitha menjëherë janë adresuar dhe evituar.”
“Medical Park” nuk është përgjigjur në pyetjet se pse kanë operuar me disa doktorë që kanë qenë staf i pa lajmëruar në DLA, që nënkupton se kanë punuar kundërligjshëm/ilegalisht dhe pse Dr. Visar Nushi ka ofruar shërbimin e protezave, shërbim ky i palicencuar në DLA/MSh.
Vendimi i plotë:
LEXO EDHE:
