Në kuadër të hulumtimeve për parregullsitë në sektorin privat të shëndetësisë, Veriu.info ka siguruar një raport inspektimi dhe procesverbalin e inspektimit të Inspektoratit Shëndetësor të Ministrisë së Shëndetësisë për spitalin special “Fati Im” në Graçanicë, me të cilin janë konstatuar shkelje ligjore për mënyrën e funksionimit nga ana e këtij institucioni privat shëndetësor të themeluar nga Dr. Afrim Muhaxhiri.
Dokumentet shpërfaqin një situatë ku Bordi për Licencimin e Institucioneve Private Shëndetësore i Ministrisë së Shëndetësisë (MSh) ka lëshuar licencë në kundërshtim me aktet nënligjore, ndërsa edhe institucioni ka dështuar të përmbushë kriteret hapësinore dhe teknike.
Bordi sfidon ligjin: Licencim për 6 veprimtari në vend të 4
Sipas vendimit me numër protokolli 05-7698, të datës 07.10.2025, Bordi i udhëhequr nga Ragip Hyseni miratoi licencimin e spitalit për gjashtë veprimtari shëndetësore. Këto shërbime përfshijnë: 1) Shërbimin e anestezionit me reanimacion me kujdes intensiv, 2) Shërbimin e Kirurgjisë, 3) Kabinetin për diagnostikim radioimazherik, 4) Shërbimin e Urologjisë, 5) Laboratorin Biokimi-Hematologji dhe 6) Shërbimin e Gjinekologjisë me Obstetrikë.
Megjithatë, raporti i inspektimit i datës 24.11.2025, i hartuar pas vizitës së inspektores shëndetësore të Ministrisë së Shëndetësisë, Dr. Ajla Zymber Çeshko, nxjerr në pah një shkelje flagrante të normave ligjore.
Në raportin e inspektimit thuhet se spitalet speciale kanë kufizime ligjore për numrin e fushave mjekësore, pasi që Udhëzimi Administrativ 03/2025 (Neni 3, par. 1.3) përcakton se një “Spital Special” është institucion që ofron shërbime të specializuara, ato mund të licencohet në vetëm një deri në katër fusha mjekësore.
Veri.info ka siguruar edhe vendimin për licencimin e “Fati Im” në gjashtë fusha mjekësore nga Bordi për Licencimin e Institucioneve Private Shëndetësor, që sipas raportimit të inspektimit është tejkaluar limitin ligjor të paraparë nga vetë Ministria.
Shkeljet në terren: Hapësira të improvizuara dhe të vogla
Inspektimi i datës 17.11.2025 zbuloi edhe se Spitali Special “Fati Im” operon në kushte që nuk përkojnë me deklarimet për licencim, kjo pasi që aty ka përzierje të institucioneve shëndetësore. Në raportimin e inspektimit thuhet se spitali “Fati Im” ka komunikim direkt me Poliklinikën “Fati Im” dhe ndajnë hapësirat e njëjta.
Po ashtu në raport konstatohet edhe fakti se laboratori i Biokimisë ishte shumë i vogël dhe nuk kishte hapësirë të mjaftueshme sipas UA 03/2025, sikurse që edhe qasja në Kabinetin e Radiologjisë ndodhet në podrum dhe për të pasur qasje duhet të kalohet përmes Poliklinikës “Fati Im”.
Siguria e embrioneve dhe pacientëve pezulloi mbylljen
Pavarësisht gjetjes se IPSh “Fati Im” me themelues Dr. Afrim Muhaxhiri nuk i plotëson kushtet për ofrim të shërbimeve të deklaruara, Inspektorati nuk vendosi letrën për ndërprerje të përkohshme të veprimtarisë për shkak të sigurisë së pacientëve. Në kohën e kontrollit, në spital ishin të hospitalizuar 8 pacientë dhe në inkubatorët e shërbimit të IVF-it ndodheshin embrionet e tri pacienteve në zhvillim e sipër.
Për këtë arsye, spitalit i ishte dhënë një afat prej 20 ditësh për të rregulluar hapësirat sipas UA 03/2025. Meqenëse spitali dhe Ministria nuk janë përgjigjur në pyetjet e Veriu.info, mbetet e paqartë nëse janë ndërmarrë masa pas skadimit të këtij afati apo nëse vazhdon operimi në shkelje të ligjit.
Heshtje totale nga Ministria dhe Spitali
Përballë këtyre fakteve, Veriu.info ka kërkuar sqarime zyrtare nga të gjitha palët e përfshira.
Kanë kaluar katër ditë që kur redaksia ka dërguar pyetje në Ministrinë e Shëndetësisë rreth bazës ligjore të këtij licencimi në kundërshtim me UA 03/2025, por asnjë përgjigje nuk është kthyer. Përgjigje nuk kemi marrë as nga spitali “Fati Im”, të cilit pyetjet i’a kemi dërguar para dy javëh.
LEXONI EDHE:
