Komuna e Lipjanit është kapur nga Zyra Kombëtare e Auditimit duke kontraktuar të njëjtat punë disa herë, me çmime të ndryshme dhe operatorë të njëjtë apo të ndryshëm, në mënyrë që të anashkalohet transparenca dhe të krijohen hapësira për pagesa të dyfishta, një metodë e papërgjegjshme dhe e dënueshme që shkatërron etikën e prokurimit publik, shkruan Demokracia.com.
Në raportin e auditimit për vitin 2024, ZKA ka identifikuar një prej rasteve më të rënda të manipulimit të pozicioneve të kontratave në fushën e prokurimit publik në këtë komunë. Konkretisht, për projektin “Mirëmbajtja e rrjetit të kanalizimit në fshatra dhe qytetin e Lipjanit”, janë lidhur dy kontrata kornizë me nga 300 mijë euro, me të njëjtin operator ekonomik.
Kontrata e parë, e lidhur në mars 2024 për periudhë trevjeçare, nuk ishte përfunduar, përkundër se në fund të vitit të njëjtë, më 30 dhjetor, u lidh kontrata e dytë – sërish me të njëjtin operator – duke ripërsëritur në paramasë shumë nga pozicionet ende të papërmbushura të kontratës së parë, por këtë herë me çmime të rritura. Këtu përfshihen punë si:
Furnizimi, transporti dhe montimi i gypave dhe pusetave,
Punët e dheut dhe betonit,
Gërmimi dhe ndërrimi i gypave të kanalizimit,
dhe të tjera të cilat janë riformuluar për të justifikuar një tender të ri për të njëjtat aktivitete.
Megjithëse auditori ka përdorur gjuhë të kujdesshme, duke thënë se kjo praktikë “mund të rrezikojë pagesë të dyfishtë”, faktet tregojnë qartë se rreziku është bërë realitet. Ripërsëritja e pozicioneve dhe çmimeve të rritura nuk janë një pasojë hipotetike, ato janë një shkelje konkrete që ka ndodhur, dhe që ka zhvlerësuar çdo mekanizëm të kontrollit të brendshëm në komunë.
As palestrat nuk i shpëtuan dyfishimit
Kjo nuk është një rast i izoluar. Në ndërtimin e palestrës sportive në fshatin Gllogovc, Komuna e Lipjanit ka përsëritur të njëjtën skemë.
Kontrata e parë për ndërtimin u lidh në vitin 2022 në vlerë 203 mijë euro, ndërsa në gusht të vitit 2024, lidh një kontratë tjetër me 106 mijë euro, për një projekt të njëjtë me modifikime të vogla, ku disa pozicione si dyert e jashtme dhe elemente të sallës së kalldajës janë të përfshira në të dy kontratat.
Sipas menaxherit të kontratës, këto pozicione nuk janë realizuar, me arsyetimin se “nuk ka qenë nevojë të vendosen”. Por pse janë futur në paramasë në radhë të parë? Dhe a janë faturuar ato?
Kjo formë kontraktimi është më shumë se vetëm “mungesë kontrolli”, është abuzim me paranë publike, është keqmenaxhim sistematik.
Auditori kërkon nga Kryetari i Komunës që të “shtojë kontrollet” dhe të “parandalojë rrezikun e pagesave të dyfishta”.
Auditori ka vërejtur edhe disa shkelje tjera ne prokurim, si dhe ne fusha tjera.
