Një aksion disa mujor i Prokurorisë Speciale të Republikës së Kosovës e ka çuar prapa grilave ushtruesin e detyrës së sekretarit të Përgjithshëm në Ministrinë e Mjedisit, Planifikimit Hapësinor dhe Infrastrukturës, Izedin Bytyçin, nën dyshimet për keqpërdorim të detyrës apo autoritetit zyrtar. Përpos arrestimit të Bytyçit, një tjetër i dyshuar, zyrtar i ministrisë, është vënë në kërkim për shkak të dyshimeve për keqpërdorim të detyrës apo autoritetit zyrtar, shpëlarje të parave dhe mosraportim apo raportim i rremë i pasurisë i të ardhurave, i dhuratave, i dobisë tjetër pasurore ose i detyrimeve financiare.
Zyrtarët e MMPHI-së dyshohen se i kanë shkaktuar Kosovës dhjetëra miliona euro dëme duke ua shlyer borxhin në forma të kundërligjshme kompanive që merren me ambalazhimin e ujit në Kosovë.
Sipas një hulumtimi të kryer nga “Albanian Post”, MMPHI i ka keqpërdorur 11 milionë e 152 mijë e 144 euro të shtetit të Kosovës. Kjo shumë është nxjerrë vetëm nga keqpërdorimi i detyrës zyrtare në rastin e pesë kompanive, teksa dyshohet se keqpërdorime janë bërë në 27 kompani.
Zyrtarët e ministrisë kanë përdorur një mënyrë të sofistikuar për të keqpërdorur detyrën e tyre zyrtare.
Ata kanë anashkaluar udhëzimin administrativ për mbledhjen e borxheve duke dërguar tek kompanitë përkatëse një dokument të kundërligjshëm duke i njoftuar kompanitë për “detyrimin financiar” që e kanë.
Vetëm në rastin e kompanisë “Compact Group” – Uji Dea, janë keqpërdorur 3 milionë e 575 mijë e 369 euro.
Kompania e themeluar nga vëllezërit Mustafë, Fadil, Feim e Saqip Shala, sipas grupit punuese të ministrisë i kishte borxh shtetit të Kosovës 3 milionë e 616 mijë e 812 euro e 02 centë. Mirëpo, kjo shumë nuk u pagua kurrë.
Uji Dea – “Compact Group”, pagoi vetëm 41 mijë e 443 euro.
E gjitha kjo pas planit të zyrtarëve të ministrisë të cilët ia kishin dërguar vëllezërve Shala një dokument të kundërligjshëm duke i njoftuar për “detyrimin financiar” që e kanë.
Vendimi i datës 17 nëntor 2022, i lëshuar nga Naser Hafizi, tregon se kompanisë i mundësohet që të paguajë vetëm 41 mijë euro dhe i numërohet borxhi vetëm për vitet 2018-2021, duke i shkaktuar kështu dëm shtetit të Kosovës prej 3 milionë e 575 mijë e 369 euro.
Kompania “Compact Group” është vetëm njëra nga pesë kompanitë prej të cilave “Albanian Post” ka publikuar keqpërdorimet, ndërkaq dyshohet se gjithsej janë 27 kompani.
Lidhur me këtë keqpërdorime, Prokuroria Speciale ka zhvilluar një aksion sot ku mbeti i arrestuar ushtruesi i detyrës së sekretarit të përgjithshëm të MMPHI-së, Izedin Bytyçi.
