Radio Televizioni Publik i Kosovës (RTK ) ka publikuar mbrëmë një lajm të përkthyer nga një mediaum boshnjak se gazetat Nacionale dhe Periskopi janë të lidhura me Serbinë dhe Vuçiqin.
Në lidhje me këtë lajm ka patur reagime të shumta.
Disa gazetarë të transmetuesit publik janë distancuar nga një lajm i tillë.
Në lidhje me këtë lajm të publikuar në RTK ka folur për “Gazeta Blic” profesori i shkencave politike nga Mitrovica, Nexhmedin Spahiu.
Spahiu tha se “nëse e kanë marrë vesh 4 milion boshnjakë, është në rregull që kjo t’i përcillet edhe 1.5 milion kosovarëve”
“Epo nëse e kanë marrë vesh 4 milion boshnjakë, është në rregull që kjo t’i përcillet edhe 1.5 milion kosovarëve. Përgjegjësia për të vërtetën apo të pavërtetën i takon mediumit boshnjak” tha shkurt Spahiu për “Gazeta Blic”.
Në lidhje me këtë lajm, ministrja e Drejtësisë Albulena Haxhiu deklaroi gjtë ditës së sotme se ka njoftuar Prokurorinë.
“Siç e keni parë dje, në RTK Live është publikuar një hulumtim që ndërlidhet me tendencën e Serbisë për të blerë media në Ballkan. Në këtë rast përmenden dy portale, është Periskopi dhe Nacionalja që thuhet sipas hulumtimit që financohen nga Serbia, nga Qeveria e Serbisë. Kam ofruar para prokurorisë edhe këtë lajm që është publikuar nga RTK Live, sepse është e rëndësishme që të dijmë se kush nga portalet financohet nga Serbia”
“Unë po them edhe njëherë që nuk është përgjegjësia e imja të them se çka dhe kush e ka përgatitur hulumtimin. Ajo cka është e rëndësihme është që e përditshmja atje është kredibile dhe hulumtimi është bërë nga ata. Prandaj iu përket institucioneve përgjegjëse që të hulumtojnë më shumë, të hetojnë më shumë këtë rast. Unë e pata obligim që t’ua ofrojë ato që i kam parë edhe vetë, jo vetëm në cilësinë e Ministres së Drejtësisë por edhe të qytetares së Republikës së Kosovës”, tha Haxhiu para gazetarëve.
