Blerand Stavileci ka qenë mysafir në emisionin “Majtas jo Djathtas” në T7, ku ka prekur tema të ndryshme.
Midis tyre edhe atë të qenit ministër dhe kryetar i klubit të basketbollit.
Tutje, ish-basketbollisti kosovar i shpjegoi sukseset e Sigal Prishtinës nën drejtimin e tij, duke i përmendur përballjet me klubet e njohura evropiane të basketbollit.
Madje, ai e bëri një krahasim mes basketbollit dhe futbollit kosovar, duke insistuar se klubet e këtushme të futbollit janë shumë larg nivelit elitar të futbollit evropian, shkruan “Gazeta Express”.
“Më e vështirë është të jesh kryetar i klubit sesa ministër. Më shumë jam sfiduar në basketboll. Në 8 vjet sa kam qenë unë, vetëm një titull dhe një kupë s’e kemi fituar. Kemi fituar ‘tripletë’, nga dy trofe, pastaj Ligën Ballkanike dy herë, pastaj kemi qenë në 16 skuadrat më të mira në Evropë”, deklaroi fillimisht Stavileci.
“Çka ta merr mendja nëse do të luanin Liverpooli ose Barcelona me ndonjërin prej ekipeve tona në futboll, mendoj se rezultati ndoshta do të ishte dyshifror. Ballkani po përballet me ekipe të njohura, por prapë Conference League është në nivel të tretë të futbollit evropian”, vazhdoi ai.
“Ne i kemi mbërri nivelet që e kemi mësuar keq publikun me suksese. Tash kemi probleme elementare: kemi problem me terminë, është e zënë salla, ndonjëherë po është i zënë Pallati i Sportit dhe po duhet të dalim në 1 Tetori dhe nëse edhe kjo palestër është e zënë, s’kemi ku të luajmë. Është e pafalshme kjo. Edhe tifozët kanë më shumë pritje. Ka probleme me rrymë, me ujë, me probleme sociale…”, u shpreh tutje Stavileci, i cili foli edhe për Ligën Unike.
