Sekretari i Përgjithshëm i NATO-s, Jens Stoltenberg, ka përmendur sërish Kosovën në para fillimit të takimit me ministrat e jashtëm të Bashkimit Evropian.
Ai para mediave ka thënë se zhvillimet që ndodhën në veri të Kosovës janë incidente serioze dhe se duhet të qëndrojnë të fokusuar në Ballkanin Perëndimor.
“Gjithashtu, sapo u ktheva nga një vizitë në rajon në Bosnje-Hercegovinë, në Serbi, Kosovë, Maqedoninë e Veriut dhe takova gjithashtu liderë nga i gjithë rajoni. Dhe sigurisht ajo që shohim atje është se tensionet po rriten. Ne kemi parë tensione të shtuara dhe retorikë nxitëse në Bosnjë dhe Hercegovinë. Ne kemi parë në fakt disa incidente të rënda të dhunës në Kosovë, duke përfshirë sulmin ndaj paqeruajtësve të NATO-s – 93 ushtarë të NATO-s u plagosën, disa prej tyre u plagosën shumë rëndë. Dhe ne pamë edhe incidentet e Banskës, ku në të vërtetë tre persona u vranë në shtator në Kosovë”.
“Pra, këto janë incidente serioze dhe ne duhet të qëndrojmë të fokusuar në Ballkanin Perëndimor. Në të njëjtën kohë, ndërsa ne sigurisht trajtojmë luftën në Gaza dhe gjithashtu vazhdojmë të ofrojmë mbështetje për Ukrainën. Jini të sigurt se NATO do të bëjë atë që është e nevojshme për të mbështetur ose siguruar stabilitetin në rajon, sepse kjo është e rëndësishme jo vetëm për Ballkanin Perëndimor, por edhe për të gjithë Evropën dhe NATO-n. Ne kemi një prani atje. Ne punojmë së bashku me Bashkimin Evropian, forcën EUFOR në Bosnje dhe Hercegovinë”.
“Dhe ne kemi një prani në Kosovë. Dhe në dritën e tensioneve të rritura, gjatë javëve të fundit, kemi shtuar mijëra trupa të tjera në praninë tonë ushtarake në Kosovë dhe ne do të punojmë ngushtë me partnerët, me aleatët në rajon për të siguruar që të bëjmë ç’është e mundur për të reduktuar tensionet dhe për të parandaluar çdo përshkallëzim të konfliktit”, ka thënë Stoltenberg.
