Gjykata Supreme e Kosovës ka vendosur të shfuqizojë si të paligjshëm Udhëzimin Administrativ të Ministrisë së Financave, Punës dhe Transfereve (MFPT), që ka të bëjë me përdorimin e pajisjeve elektronike fiskale, sistemeve fiskale dhe softuerëve elektronikë fiskalë.
Në vendimin e saj, Gjykata ka aprovuar kërkesëpadinë e paditësve, të cilët kishin kontestuar Udhëzimin Administrativ nr.01/2025 “Për Shfrytëzimin e Pajisjeve Elektronike Fiskale, Sistemeve Fiskale dhe Softuerëve Elektronikë Fiskalë”, të publikuar në Gazetën Zyrtare më 16 prill 2025.
Sipas aktgjykimit, Gjykata Supreme e ka shpallur të paligjshëm dhe ka shfuqizuar në tërësi këtë udhëzim administrativ të Ministrisë së Financave, duke konstatuar se nuk qëndron në bazë juridike dhe se ka qenë në kundërshtim me normat ligjore.
Ndërkaq, është refuzuar kërkesa e paditësve për caktimin e një mase të përkohshme të sigurisë për ndalim të zbatimit të udhëzimit deri në një vendim përfundimtar, me arsyetimin se vendimi meriton shqyrtim të plotë përmes kërkesëpadisë dhe jo përmes masës së përkohshme.
Në vendimin e saj, Gjykata ka konstatuar se ky udhëzim administrativ ishte nxjerrë në kundërshtim me ligjet dhe Kushtetutën e Kosovës. Konkretisht, Gjykata ka theksuar se Ministri i Financave, Hekuran Murati, nuk kishte të drejtë ligjore të nxirrte udhëzime administrative pas përfundimit të mandatit të tij katërvjeçar, pra në cilësinë e një ministri në dorëheqje.
Sipas Gjykatës, një Qeveri në dorëheqje mund të ndërmarrë vetëm veprime të domosdoshme të planifikuara më parë në përputhje me planin vjetor dhe buxhetin e shtetit, por nuk ka kompetenca për të nxjerrë udhëzime administrative të reja.
Udhëzimi në fjalë ishte nënshkruar nga Murati më 15 prill 2025, pas përfundimit të mandatit të qeverisë dhe pas certifikimit të rezultatit të zgjedhjeve parlamentare.
Ky udhëzim kishte për qëllim zëvendësimin e sistemit të arkave fiskale me një sistem të ri dixhital të raportimit, me afat zbatimi deri më 15 qershor 2025.
Megjithatë, Ministria e Financave nuk kishte ndërmarrë hapa për zbatimin e këtij projekti, duke shkaktuar paqartësi dhe kaos në treg.
Paditësit pretenduan se udhëzimi i kontestuar cenonte të drejtat e tyre të ligjshme dhe se kishte ndikim të drejtpërdrejtë në licencat që ata mbanin për ofrim të pajisjeve fiskale elektronike, të cilat ishin të vlefshme deri në vitin 2028. Ata theksuan se ndryshimet e bëra përmes këtij udhëzimi i vendosnin në rrezik për humbje kontratash, investimesh dhe sistemi tërësor të funksionimit me klientë.
Gjithashtu, sipas argumentimit në padi, udhëzimi binte ndesh me parimet e Ligjit për Procedurën e Përgjithshme Administrative, si: barazia tatimore, transparenca, parimi i ligjshmërisë dhe parimi i mosdiskriminimit.
Supremja sqaroi se vetëm Qeveria dhe ministri kanë të drejtë ligjore për nxjerrjen e udhëzimeve administrative, sipas procedurës që parashikon përgatitjen e draftit, dërgimin në Qeveri, miratimin dhe pastaj publikimin në Gazetën Zyrtare.
