Publicisti, Veton Surroi, ka shkruar të mërkurën se është në mbështetje të planit euro-amerikan për dialogun Kosovë-Serbi.
Ndonëse zyrtarisht njihet si plani franko-gjerman, ndërkaq shefi për Politikë të Jashtme të Bashimit Evropian për Politikë të Jashtme dhe Siguri, Josep Borrell e quan plan evropian, sërish plani në fjalë ka pak rëndësi emërtimi pasi ka gjetur mbështetje edhe të Shteteve të Bashkuara të Amerikës siç thuhet nga diplomatatët perëndimorë për t’i dhënë dinamikë të re dialogut në mes Kosovës dhe Serbisë.
Surroi në një opinion të botuar në KOHA, thotë se Kosova bën mirë ta pranojë këtë plan. Beson se është e nevojshme të ketë unitet politik në vazhdimin e bisedimeve me Beogradin.
“Prej 20 janarit të këtij viti Kosova dhe Serbia kanë hyrë në një proces të ri negociator. Të dy palëve u është kërkuar përgjigje a e pranojnë kornizën e re negociatore prej dhjetë pikësh. Kjo kornizë u paraqit fillimisht në shtator të vitit të kaluar si plan Scholz-Macron, apo gjermano-francez, apo franko-gjerman, në dhjetor u paraqit nga J. Borell para vendeve anëtare të BE-së dhe u shndërrua në plan evropian, e nga deklarimi i të dërguarit amerikan Escobar gjatë këtij muaji, është plan i përbashkët euro-amerika”, ka shkruar ndër tjerash Surroi.
Ai thotë se “që nga procesi Ahtisaari që solli shpalljen e pavarësisë së Kosovës, kjo është përpjekja më serioze ndërkombëtare për ta zgjidhur çështjen e marrëdhënieve mes Kosovës dhe Serbisë”.
Ndër të tjerash Surroi rezultatet një dekadësh të dialogut Kosovë-Serbi i cilëson si modeste.
Është për një dinamikë të re të dialogut, për këtë e sheh një mundësi të mirë edhe planin franko-gjerman.
“Në këtë shkrim me qëllim nuk i përmenda rreziqet me të cilat që të dyja palët ballafaqohen nëse nuk e pranojnë qasjen euro-amerikane (e për këtë foli zgjerimisht presidenti Vuçiq). Nuk po i përmend as rreziqet e pranimit symbyllas e në formë jokritike të kësaj qasjeje; në fakt Kosova as edhe në momentet më të vështira të luftës nuk i ka pranuar symbyllas dhe në formë jokritike propozimet diplomatike”, ka thënë ndër tjerash publicisti. /Express
