Ministri i Punëve të Brendshme, Xhelal Sveçla, beson se deri në fund të tetorit, nuk do të ketë më targa ilegale. Në fund të muajit, Sveçla nuk pret eskalim të situatës, por thotë se mund të ketë ndonjë rezistencë aty-këtu.
“Në raport me targave, në fund të këtij muaji, unë besoj se do të kemi një situatë ku nuk do të kemi më targa ilegale dhe do të kalojmë tek problemet e tjera, tek zgjidhja e problemeve tjera. Ky nuk është i vetmi problem që kemi as si Kosovë, por as në raport me Serbinë”, thotë Sveçla.
Ministri thotë se nuk duhet të ketë marrëveshje të re për çështjen e targave, sepse tashmë ekziston një për këtë çështje dhe ajo duhet zbatuar.
“Ne kemi tashmë një marrëveshje, por Serbia nuk lejon implementimin. Tash, nuk besoj se do të ketë nevojë të ketë një marrëveshje politike, pastaj një marrëveshje teknike, pastaj një marrëveshje për implementim. Sepse, kjo është qasja që Serbia e do”, tha Svecla në një intervistë për A2CNN në Shqipëri.
Më 31 tetor, kur edhe përfundon afati i pezullimit të zbatimit të marrëveshjes së reciprocitetit të targave, Sveçla nuk pret eskalim të situatës, duke risjell në vëmendje mobilizimin e misioneve të huaja për ta ruajtur stabilitetin në veri të Kosovës.
“Nuk ka asnjë indikacion që mund të ketë ndonjë telashe, kështu, të themi, ekstreme. Mund të ketë rezistencë tek-tuk, në kuptimin e refuzimit për t’i shndërruar targat nga ilegale në legale, por nuk besoj se mund të ketë eskalim të situatës”.
“Posedimi i targave ilegale për këta qytetarë [qytetarët serbë] është vetëm vështirësi. Duke qenë se ata nuk mund të qarkullojnë në pjesët e tjera të Kosovës, duke qenë se janë bashkëpjesëmarrës në aktivitet ilegal. Gatishmëri nga qytetarët ka, por, fatkeqësisht, ka presion të tmerrshme të strukturave të Aleksandër Vuçiqit në këtë zonë”.
Ai thotë se gatishmërive të banorëve të veriut për legalizim, strukturat paralele u përgjigjen me sulme.
