KosovëShare Button Gazeta Blic Kryeministri Albin Kurti ka dështuar në dialogun me Serbinë.
Kështu ka vlerësuar ish kryenegociatorja e Kosovës në dialogun me Serbinë, Edita Tahiri, në një intervistë për Gazeta Blic.
Ajo thotë se Kurti nuk e arriti marrëveshjen reciproke derisa e kishte përkrahjen e madhe nga presidenti Biden, ndërsa që thotë se pranoi Asociacion me vetëmenaxhim që është Republikë Srpska në Kosovë.
“Kurti dështoi në dialogun e Brukselit, plotësisht. E para, nuk e arriti një marrëveshje me njohje reciproke, përkundër që kishte një përkrahje të madhe të presidentit amerikan, Biden, i cili mbështeti njohjen reciproke, Kurti e dështoi. Pastaj e arriti këtë marrëveshje, e pranoi Asociacionin dhe nuk u mjaftua që e pranoi Asociacionin, në bisedimet për marrëveshjen zbatuese të Ohrit, ai pranoi edhe Asociacion plus, duke i dhënë pakicës serbe edhe vetëmenaxhimin, me fjalë të tjera, bashkë Asociacioni me vetëmenaxhimin është një Republikë Srpska në Kosovë, këtë e ka bërë Kurti këtë dështim”, shprehet ajo.
Tahiri thotë se po të ishte në vend të Kurtit do të analizonte ecjen gabim, pasi ai mbeti duke riparuar gabime, ndërsa që përmend bisedat me Radojçiqin e gabime të tjera.
“Po të kisha qenë unë Kurti do ta kisha analizuar pak ecjen gabim. Mbeti Kurti në riparimin e pasojave, Banjska u bë, ne u ndëshkuam, këta u zunë në komunikim para Banjskës, me kë, me kryeterroristin Radojçiq. Pra, gjërat shumë të rënda, shumë të turpshme, të dëmshme për interesat kombëtare të Kosovës. Ka nevojë për reflektim nga Kurti, të shohë gabimet e veta, secili duhet ta bëjë, çdo lider, sidomos i një shteti, i një populli, ka nevojë refleksione edhe që vetes t’i tregojë, këtu dështova, këtu e ndal”, vlerëson Tahiri për Gazeta Blic.
Sipas saj, qytetarët e kanë në dorë derisa janë zgjedhjet që ta zgjedhin një qeveri, pasi tani e kanë parë dhe Kurtin duke qeverisur.
“Ndërsa, në anën tjetër unë besoj që qytetarët e kanë në dorë meqë janë zgjedhjet, e kanë parë edhe këtë qeveri, përpara s’e kishin parë, na kishin parë vetëm neve, tani e kanë parë dhe e kanë në dorë ndryshimin që Kosova të kthehet drejt përparimit, zhvillimit, drejt mbrojtjes së dinjitetit dhe integritetit shtetëror, sepse ti kur dështon në dialog me armikun, nuk ka më rëndë”, potencon ajo.
Po ashtu, ish zëvendëskryeministrja thotë se Kurti ishte mësuar t’i mashtrojë votuesit, ndërsa që njësoj nuk mundi të veprojë me ndërkombëtarët, ku morëm sanksione e s’kemi asnjë njohje.
“E para, është shumë e thjeshtë të kuptohet kjo situatë. Kurti ishte mësuar t’i mashtrojë votuesit e vet. Kur u përball me dialog ndërkombëtar, me faktor ndërkombëtar, ai provoi t’i mashtrojë me populizmin e tij por a u mashtrua BE, jo, a u mashtruan amerikanët, jo. Çka bënë? E ndëshkuan Kosovën. Mirë që amerikanët na i hoqën sanksionet por erdhi zyrtarja evropiane në Prishtinë dhe na tha që nuk i heqin sanksionet, ka ende punë për të bërë. Këto janë shumë të dëmshme, me pasoja. Mbeti Kurti duke gabuar dhe duke punuar në riparimin e pasojave të gabimeve të veta, pra, s’ka zhvillim, ka vend numërim dhe dëmtim të shtetit të Kosovës. Në botë, sidomos ata që nuk na kanë njohur, po të kishin pasur shenja pozitive nga ana e Kosovës, do të kishte ndonjë njohje. Është shqetësuese”, deklaron Edita Tahiri.
