Bilall Sherifi nga Nisma Socialdemokrate, ka komentuar takimin e sotëm Kurti-Vuçiq të mbajtur në Bruksel.
Ai në një prononcim për Gazeta Blic, thotë se sot u kuptua se Kurti nuk e ka problem Asociacionin dhe prandaj e ka pranuar, por problemin e ka vetëm te radha e zbatimit të tij, që nuk do që ajo të zbatohet tani por kur t’i vie radha.
“Përfundimisht është kuptuar që Albin Kurti nuk ka problem me Asociacionin por me radhën e zbatimit të të marrëveshjeve të arritura në Bruksel dhe në Ohër. Sot Kurti konfirmoi se nuk e ka problemin formimin e Asociacionit por ajo nuk duhet të bëhet njëherë, para se të realizohen marrëveshjet e mëparshme. Ai i radhiti disa marrëveshje të mëparshme dhe tha se nuk mund të nxirret kjo, e dini strategjinë e tij të famshme se nuk mund të nxirret kjo nga pika e 10 pasi i kemi disa punë të tjera. Por, si duket kjo nuk po i funksionon tash, sepse presioni do të vazhdojë të rritet që të zbatohet Asociacioni. Z.Kurti ka vërtetuar se nuk e ka problem atë. Po ta kishte nuk do ta kishte pranuar, as në Bruksel e as në Ohër. Tash që e ka pranuar po tenton t’i shmanget duke kërkuar që së pari të bëhet njohja de facto”, thotë ai.
Sipas Sherifit, çështja tjetër që u kuptua nga takimi i sotëm është që Kurti s’ka strategji pos që shpreson te Serbia që mos t’i zbatojë marrëveshjet e arritura dhe kështu kërkon shpëtim te Vuçiqi.
“Çështja e dytë është se sot përfundimisht kuptuam se Kurti nuk ka strategji tjetër, pos shpresës që Serbia nuk do t’i zbatojë marrëveshjet tjera, sidomos njohjen de facto, edhe pse nuk besoj në atë, nuk ekzistojnë në marrëdhëniet ndërkombëtare, ekziston vetëm njohja de jure. Strategjia e tij është që ta shpëtojë Vuçiqi dhe Serbia, duke mos i zbatuar marrëveshjet dhe kjo është keq sepse dëmi po i bëhet Kosovës dhe bota po e fajëson Albin Kurtin dhe dëmet po i vuan Kosova e jo ai”, vlerëson ai për Gazeta Blic.
Sa i përket asaj se a janë të anshëm ndërmjetësuesit, Sherifi thotë se është qasja e Kurtit që të pranojë çdo gjë dhe të shpëtojë pastaj, por për çdo gjë që pranon, ai duhet ta zbatojë.
“Unë nuk besoj se ata janë kundër Kosovës, as Borrell, as Lajçak e as Escobar. Problemi është qasja e kryeministrit Kurti në këtë dialog ka qenë e tillë që të pranojë çdo gjë që kërkohet por pastaj të shpëtojë nga pranimi duke kërkuar që të zbatohet marrëveshja sipas radhës që do ai dhe jo siç do Serbia, por kjo nuk funksionon në diplomacinë ndërkombëtare. Z.Kurti duhet ta dijë se në momentin që e pranon një marrëveshje, vjen momenti që duhet ta zbatojë, ose e nxjerr shtetin e tij keq”, potencon Bilall Sherifi.
Se a pret se do të ketë sanksione të tjera ndaj Kosovës, ai thotë se ato po e dëmtojnë Kosovën dhe jo Kurtin.
“A do të ketë sanksione, masa embargo, sido që të quhen, janë ndëshkim, Albin Kurti nuk po e pëson asnjë masë por atë po e pëson Kosova. Qeveria duhet të ketë një strategji të saj dhe jo të shpresojë te Serbia”, deklaron Sherifi nga Nisma Socialdemokrate./Gazeta Blic/
