Talenti i Liverpoolit, Rio Ngumoha, tani duhet t’i përmbahet një rregulli strikt të Premierligës pasi ka mbushur 18 vjeç, ndërsa Max Dowman vazhdon të jetë i përjashtuar.
Pas zhvillimeve rreth largimit të mundshëm të JJ Gabriel nga Manchester Unitedi, të rinjtë e Premierligës nuk kanë tërhequr kurrë më parë kaq shumë vëmendje nga tifozët.
Mes shumë adoleshentëve që luajnë në elitën e futbollit anglez, anësorët e Liverpoolit dhe Arsenalit, Ngumoha dhe Dowman, konsiderohen ndër talentët më premtues, pasi tashmë kanë dëshmuar se çfarë janë në gjendje të bëjnë në nivelin më të lartë.
Në moshën 16-vjeçare, Ngumoha shënoi një gol në minutat e fundit në transfertën ndaj Newcastle Unitedit, duke e rritur edhe më shumë vlerën e tij, ndërsa Dowman u bë lojtari më i ri në histori që shënon në Premierligë, kur realizoi në fitoren 2-0 ndaj Evertonit, në moshën 16 vjeç e 73 ditë.
Ndërsa Dowman mbush 17 vjeç më 31 dhjetor të këtij viti, Ngumoha, i cili është ftuar në Kombëtaren e Anglisë nga Thomas Tuchel përpara pushimit të tetorit për ndeshjet e kombëtareve, festoi ditëlindjen e tij të 18-të më 29 gusht.
Tani që Ngumoha është ligjërisht i rritur, rregullat që zbatohen për të kanë ndryshuar, ndërsa ato vazhdojnë të jenë në fuqi për Dowman.
Dowman nuk lejohet të ndërrohet në dhomën e zhveshjes me bashkëlojtarët e tij për shkak të rregullave të mbrojtjes së të miturve dhe duhet t’i sigurohet një hapësirë alternative, ndërsa Ngumoha tani mund t’u bashkohet bashkëlojtarëve të Liverpoolit në dhomën e zhveshjes pasi ka mbushur 18 vjeç.
Klubet gjithashtu duhet të sigurohen që lojtarët nën moshën 18-vjeçare të kenë një dhomë dushi të caktuar, e cila monitorohet nga shoqërues zyrtarë të ekipit nga departamenti i mbrojtjes së të miturve, me kusht që këta shoqërues të jenë të regjistruar në DBS.
Dowman gjithashtu nuk lejohet të mbajë pajisje me sponsorë të basteve të shtypur në to, ndërsa Arsenali duhet të sigurohet që ai të mbahet larg alkoolit nëse lojtarët e ekipit të parë janë duke konsumuar alkool, megjithëse kjo nuk ka shumë gjasa të ndodhë në radhë të parë.
16-vjeçari gjithashtu përjashtohet nga rregulli i 10 sekondave për zëvendësimet. Ky rregull u prezantua përpara sezonit 2026/27 të Premierligës dhe synon të përshpejtojë ritmin e lojës.
Lojtarët 18 vjeç e lart, përfshirë Ngumohan, pritet të largohen nga fusha në pikën më të afërt. Mosrespektimi i këtij rregulli mund ta vonojë zëvendësimin për një minutë, duke e detyruar ekipin të luajë me 10 lojtarë.
Më pas, zëvendësuesi duhet të qëndrojë jashtë fushës deri në ndërprerjen e radhës të lojës. Megjithatë, lojtarët nën moshën 18-vjeçare këshillohen të largohen nga fusha në vijën e mesit, pranë pankinave, për arsye të mbrojtjes së të miturve.
Dowman përjashtohet nga rregulli i lartpërmendur deri sa të mbushë 18 vjeç, pas 467 ditësh./GazetaExpress/
