Taulant Xhaka, dje e ka zhvilluar ndeshjen e tij të fundit si profesionist.
Ai i dha fund një karriere të bujshme me FC Baselin dhe kombëtaren e Shqipërisë.
Xhaka në një intervistë për gazetën e njohur zvicerane rrëfeu emocionet e mëdha që përjetoi në ditën kur i tha lamtumirë futbollit.
34 vjeçari tha se i është dashur të përmbahej pasi nuk ka dashur të qajë para babait të tij, Ragipit.
“Më është dashur të përmbahem pasi nuk kam dashur të qaj para babait tim. Por tashmë kisha lotë në sytë e mi. Koreografia e tifozëve ishte e jashtëzakonshme”, deklaroi ai transmeton Klankosova.tv.
Në ndeshjen përmbyllëse, FC Basel triumfoi me rezultat 4:0 ndaj Luzernit.
Para fillimit të ndeshjes, klubi organizoi një ceremoni të veçantë për të nderuar kontributin e Xhakës, i cili për më shumë se një dekadë ishte një figurë kyçe në mesfushën e skuadrës.
Gjatë karrierës së tij me FC Basel, Taulant Xhaka zhvilloi 406 ndeshje zyrtare, duke fituar gjashtë herë titullin e kampionit të Zvicrës dhe tri herë Kupën e Zvicrës.
Ai gjithashtu përfaqësoi Kombëtaren shqiptare në 31 ndeshje, duke shënuar një gol, dhe ishte pjesë e skuadrës që mori pjesë në Kampionatin Evropian 2016.
