Tentim vrasje apo vetëmbrojtje? Mbrojtja e Azem Kurtajt insiston se Gjykata vendosi nën presion

Kërveshi, nga ekipi mbrojtës i pjesëtarit të FSK-së Azem Kurtaj insiston se vendimi për caktimin e paraburgimit u bë nën presion. Ai theksoi se autoritetet  i dhanë gola vetës, duke ia dhënë këtij rasti ngjyrën e një sulmi etnik pa kurrëfarë nevoje dhe pa dëshmi. Avokati Kujtim Kërveshi i ftuar në “Frontal” në T7, foli edhe për ndërrimin e deklaratës së nënës së njërit djalë të plagosur, e cila fillimisht u shpreh për një media serbe se nuk ka qenë qëllimi të goditen personat, por pasi rasti u kualifikua në prokurori si “vrasje në tentative” ajo deklaroi se qëllimi ishte të vriteshin fëmijët e saj.

Gjatë bisedës në “Frontal”, avokati Kujtim Kërveshi tha se ky rast s’ka pasur motive etnike ashtu siç autoritetet u nxituan ta cilësojnë. Ai rithekson se ky ishte rast vetëmbrojtje.

“Sa i përket kërkesës së prokurorisë, ka një lloj shpërputhje faktike dhe fizike me realitetin se si prokuroria pretendon me argumentu  rrjedhjen e ngjarjes. Kam besu edhe para se mu kyç ne këtë rast se diçka nuk është në rregull me përshkrimin faktik që ishte bërë në publik, fillimisht nga komunikimet në deklaratat e policisë e pastaj nga informacionet zyrtare dhe jozyrtare. Në këtë rast nuk është normale me dështu autoritetet e Republikës së Kosovës para një situate që ka mundur të eskalojë në çështje të sigurisë. Nuk është normale që autoritetet zyrtare të japin konkludime duke nxitu kush i pari po etiketon një qytetar të vetin. Mësimi i parë që është dashtë mu nxjerr është që kjo çështje dukej haptas që ska të bëjë me motive etnike, nuk e di se për çfarë arsye autoritetet kanë nxitu me i dhanë kësi lloj atributi një fenomeni që për mendimin tim është. Është thjesht një rast i një vetmbrojtje”, tha Kërveshi në T7, transmeton Gazeta Express.

Avokati Kujtim Kërveshi foli edhe për ndërrimin e deklaratës së nënës së njërit prej të dëmtuarve dhe presionin që iu bë autoriteteve të drejtësisë, kur në kohën kur mbahej seanca për caktimin e paraburgimit në Shtërpcë ishte organizuar protestë.

Ai tha se nëna e të plagosurit ndërroi skenarin brenda 48 orësh.

“Natën e incidentit njëra e një të dëmtuarit, por edhe babai. Babai tha se nuk e di se cilin ta fajësojë dhe këtë nuk e tha në mediat tona, në të cilën tha se nuk është shtie – nuk është qitë në drejtim të fëmijëve por në drejtim të asfaltit dhe aty nisi me u kuptu që nëna e njërit të dëmtuar kishte kuptuar nga të tjerët nga vendi i ngjarjes që s’ka pas qëllim askush t’i goditë ata me predhë drejtpërdrejt. Tash këtë duhet me lidhë më kualifikimin që e ka dhënë prokuroria…. Bash në kohën kur mbahej gjykimi për caktimin e masës së paraburgimit mbahej një demonstratë në Shtërpcë, janë sinkronizu edhe veprimet, nuk ka ndryshe si me u vendos sistemi ynë para presionit sesa në kohën kur gjykata mban seancë në të njëjtën kohë bëhen organizime me motive etnike. Presion është drejtpërdrejt në vendimmarrjen e autoriteteve. Pasi u bë kualifikimi vrasje në tentativë për më pak se 48 orë nëna thotë jam e bindun që kanë pas qëllim me mi vra fëmijët. Ka ksi lloj diskrepence në deklarim”, u shpreh Kërveshi.

Ai tha se kjo situatë e shpërfaq ndërhyrjen e personave të cilët kanë interes që Republikën e Kosovës ta vënë para një testi të rrezikut të Kushtetutshmërisë dhe ligjshmërisë në këtë vend.

Sipas Kerveshit  Azem Kurtaj ka gjuajtur njëherë në ajër e njëherë në drejtim të asfaltit për ta shpërndarë turmën që kishin mjete të forta në duar, drunj të gjatë rreth 3 metra.

“Prokuroria kualifikimin e ka të vrasjes së rëndë në tentativë, këtë duhet me argumentu me dashjen direkte por në pamundësi për ta privuar dikë nga jeta merr veprime me qëllim por rezultati nuk arrihet. A mendojnë qytetarët, hetuesit dhe prokuroria e gjyqtarët se një ushtarak i përgatitur i stërvitur po të kishte dashtë me qitë për ta privuar dikë nga jeta, nuk kishte pas mundësi me privu nga ajo distancë a? Është qitë njëherë në ajër, herën e dytë në drejtim të tokës. Nuk mund të ketë vrasje në tentativë kur dikush qet për ta shpërnda turmën që ka pas dhe është shfaq një rrezik i vërtetë kemi parë edhe fotografi, nëse prokuroria i lidh me ngjarjen konkrete nuk bëhet fjalë për fëmijë ata janë persona të rritur dhe kanë sende të forta në dorë, dikush pankarta e dikush një dru më të madh se 3 metra gjatësi. Unë nuk arrij me kuptu si institucionet e Kosovës i japin vrull vetës, nga një incident kur dikush nga organizimi me qëllim ose pa qëllim mendon që ka tagrin e drejtësisë mi vu dikujt pengesa në lëvizje me rreziku jetën e dikujt ne kthehemi në anën e kundërt tash që atë që ka dasht me heq rrezikun nga vetja e ngarkojmë me diçka si vrasje në tentaivë”, u shpreh avokati.

Ai shprehet se faktet thonë se ai nuk ka goditur në drejtimin e tyre.

VIDEO E PLOTË E FRONTAL KËTU

Gjithashtu ka edhe kritika për ministrin e Brendshëm Xhelal Sveçla duke theksuar se i njëjti ia dha “vulën e fajtorit një qytetari të Republikës së Kosovës”.

“Autoritetet tona e dhanë ngjyrën e një sulmi etnik kombëtarë pa kurfarë nevoje, pa kurfarë dëshmie e arsye.  E futën në atribute të një sulmi mbi baza të motiviit kmbëtar, a e dini cfarë pasojë i sjellë Republikës së Kosovës, kur i pari i ekzekutivit pa një pa dy vrapon mi dhanë gol vetës”, shprehet ai.

Gazeta Express, të hënën raportoi se mbrojtja e pjesëtarit të FSK-së, Naim Ferati, brenda afatit ligjor do të paraqesin ankesë në Gjykatën e Apelit për të rrëzuar vendimin e shkallës së parë, i cili e la Azem Kurtajn në paraburgim për një muaj. Në njoftimin e gjykatës u tha se pjesëtari i FSK-së ka shtënë në drejtim të dy vëllezërve, por avokati tha se ai ka shtënë në tokë dhe jo në drejtim të tyre.

Ai tha se turma e ka sulmuar atë dhe klienti i tij ka qenë shumë real dhe i sinqert në deklarimet e tij.

“Ata e kanë sulmu në veturën që ka qenë ky, ka qenë i rrethuar dhe i bllokuar”.

Azem Kurtaj u la në paraburgim nën dyshimin për kryerjen e tri veprave penale, si: “vrasja e rëndë në tentativë nga neni 173 paragrafi 1 nën paragrafi 1.1, 1.5 dhe 1.11 lidhur me nenin 28; përdorimi i armës apo mjetit të rrezikshëm nga neni 367 paragrafi 1;  shkaktimi i rrezikut të përgjithshëm nga neni 356 paragrafi 1 të Kodit Penal të Republikës së Kosovës (KPRK)”.

Ndërsa, Ministri Nenad Rashiq, nuk ka asnjë dyshim se gjuajtja me armë zjarri ndaj 21 dhe 11 vjeçarit në Shtërpcë kishte qëllim vrasjen e tyre.

“Nuk kam asnjë dyshim që ai i gjuajti fëmijet për t’i vrarë ata”, ka thënë tutje ministri.