Një tender të majmë me AQP-në. Një me ZKM-në. Një vizitë e ‘ngrohtë’ e Kryeministrit Kurti në biznesin e Arif Elshanit, që mban përfaqësinë e markës Peugeot. Krejt këto, janë shoqëruar me profite në drejtim të Elshanit. E, një hulumtim i Insajderi ka gjetur që për tenderin që ia dha Zyra e Kryeministrit, në procedurë, janë ndryshuar së paku dy pika të Dosjes, për të cilat ZKM-ja ende nuk ka kthyer përgjigje se pse i bëri.
Një kontratë me Agjencinë Qendrore të Prokurimeve, e mandatuar për të tenderuar punë të mëdha, nuk i kishte kryer boll punë Zyrës së Kryeministrit Albin Kurti, kur bëhet fjalë për veturat zyrtare.
Zyra e Kryeministrit bëri edhe një kontratë tjetër me firmën e biznesmenit Arif Elshani, e të cilin personalisht e kishte vizituar Albin Kurti.
ZKM-ja e ka kontraktuar firën e Elshanit për t’ia marrë me qira 15 vetura, me çmim 550 euro në muaj për veturë.
E njëjta firmë ka edhe kontratën tjetër me AQP-në, për 80 vetura për një vlerë prej mbi 1.9 milionë eurosh, apo sic del në përllogaritje: qiraja për një veturë shkon 24 mijë euro.
Duke anashkaluar AQP-në, siç dyshohet në kundërshtim me nenin 95 të Ligjit të Prokurimit Publik, ZKM-ja hyri në marrëdhënie kontraktuale me biznesmenin Elshani, dhe del që diçka ndodhi edhe në vet procedurën e tenderit
Një hulumtim i Gazetës Insajderi ka zbuluar se ky tender ka pasur edhe një ‘ndërhyrje’ në procedurë të tenderimit.
Ndryshimet në kritere për të cilat hesht ZKM-ja
Vet Zyra e Kryministrit, pasi që kishte shpallur tenderin dhe kishte marrë interesimet e kompanive, del që vendosi ti ndryshoi dy kritere krejt bazë, që lidhen me përformacën e veturave që po kërkonin.
Më 13 nëntor 2024 ishte shpallur tenderi.
Vetëm pesë ditë më vonë, më datën 18 nëntor të vitit të kaluar Zyra e Kryeministrit Albin Kurti, departamenti i tenderëve, krijon një dokument të ri, e që bën me dije se ka ndryshuar dy kritere, sipas tyre, për sqarim, pasi që ka marrë një pyetje nga një i interesuar për të ofertuar në këtë tender.
Një përgjigje për këtë interesim të një kompanie, që nuk ia përmendin emrin, kishte ardhur menjë herë, dy ditë pas shpalljes.
Isa Hajdari nga Zyra e Kryeministrisë e kishte nënshkruar këtë sqarim në lidhje me dosjen e këtij tenderi.
Por, çka u ndryshua nga ZKM-ja në tenderin që në fund e fitoi firma e Arif Elshanit, përfaqësues i markës Peugeot?
Në fillim, ZKM-ja kërkoi që, te pjesa teknike, motori i veturave që po kërkonin ishte në “minimum 1.998 ccm3”
Pesë ditë më vonë këtë kriter e ndryshoi në atë që sipas tyre tash ‘kapaciteti i motorit – vëllimi i motorit duhet të ishte në minimum 1940 ccm3″, por deri tash nuk ka dhënë shpjegim në pyetjet e Insajderit se pse u bë ky ndryshim, dhe se kush saktë e kërkoi atë.
Edhe në pozicionin 6 teknik kishte bërë edhe ndryshimin e dytë.
“Pozicioni 6. Fuqia e motorit PS/hp : Min. 120 Ps/hp deri 3000 ccm3″, që ishte në fillim të shpalljes së tenderit, më vonë u shndërrua në “fuqia e motorit KË: Minimum 100 KË”, thuhet në dokumentin që në platformë “e-prokurimi” e publikoi Zahir Bunjaki, të cilit i ka dërguar pyetje Insajderi, por ende nuk është përgjigjur.
Gazeta Insajderi për këtë ndryshim në kritere e ka njoftuar edhe Departamentin e Monitorimit në Komisionin Rregullativ të Prokurimit, por të njëjtit ende nuk kanë kthyer ndonjë koment.
Firma e biznesmenit Arif Elshani në një përgjigje për Insajderin ka thënë se nuk ishin ata si kompani që e kërkuan këtë ndryshim.
“…çdo vendim për të ndryshuar kriteret e një tenderi është ekskluzivitet i autoritetit kontraktues. Ne, si çdo kompani tjetër, kemi pasur qasje në dokumentacionin publik përmes sistemit të e-prokurimit dhe kemi aplikuar brenda kushteve të përcaktuara sipas thirrjes publike, asnjëherë nuk kemi dërguar letër standarde/kërkesë për ndryshim të dosjes së tenderit por kemi aplikuar bazuar në thirrjen publike të publikuar në e-prokurim”, thuhet në përgjigjen e “Mercom Auto”.
“Mercom Auto” thotë tuje se “e mohon kategorikisht çdo përfshirje në ndonjë veprim që shkel ligjin apo normat etike, veçanërisht në rastin e kontratave me institucione shtetërore. Kontrata në fjalë është lidhur nga Zyra e Kryeministrit (ZKM), një institucion që operon brenda kuadrit ligjor dhe që duhet të zbatojë ligjet e Republikës së Kosovës”.
Ata kanë komentuar edhe vizitën e Kryeministrit Kurti tek firma e Elshanit, edhe pse janë në marrëdhënie kontraktaule, pra kompania si punëmarrëse, e Zyra e Kryeministrit, si punëdhënës, thonë që nuk kanë ndonjë lidhje, pos që kanë mirëpritur, sipas tyre, një zyrtar shtetëror.
“Lidhur me vizitat e ndonjë zyrtari në ambientet tona, përfshirë edhe Kryeministrin Kurti, theksojmë se nuk kemi asnjë lidhje personale apo politike me të, dhe vizitat kanë qenë të natyrës publike dhe transparente – aspak të ndërlidhura me ndonjë proces tenderimi. Kompania jonë mirëpret çdo zyrtar qeveritar apo komunal pavarësisht përkatësisë se tyre politike”, thuhet në përgjigjen e tyre.
