10 zyrtarë të shtetit do të përballen së shpejti me drejtësinë. Kjo nën akuzat për keqpërdorim të detyrës zyrtare. Pjesa më e madhe janë ish-zyrtarë të Ministrisë së Infrastrukturës, kurse tre ish-udhëheqës të Organit Shqyrtuer të Prokurimit. Për çfarë bëhet fjalë dhe cila është pasuria e këtyre zyrtarëve?
Nënshkrimi i një kontrate lidhur me rrugën Prizren-Prevallë në vlerë mbi 14 milionë euro, pritet t’i vë përballë drejtësisë 10 zyrtarë. Ata po dyshohen për keqpërdorim të detyrës zyrtare, e njëra prej tyre edhe për falsifikim.
Aktakuza është ngritur ndaj zyrtarëve Betim Reçica, Valmira Bllaca, Zymer Abdullahu, Jetmir Alaj, Emir Morina, Blerim Dina, Nuhi Paçarizi, Goran Milenkoviç, Izedin Bytyqi dhe Muhamet Gashi.
Jozyrtarisht Nacionale ka mësuar se në mesin e të akuzuarve është edhe Betim Reçica, ish-sekretar në Ministrinë e Infrastrukturës. I akuzuar gjithashtu është edhe Izedin Bytyqi, edhe ky dikur sekretar në Ministrinë e Infrastrukturës.
E akuzuar është edhe Valmira Bllaca, e cila një kohë ka ushtruar detyrën e drejtoreshës së Divizonit të Prokurimit në Ministrinë e Infrastrukturës. I akuzuar është edhe Muhamet Gashi. Ky i fundit në kohën e qeverisë Hoti ishte emëruar zv/ministër i Infrastrukturës.
I akuzuar është edhe Zymer Abdullahu që një kohë ishte emëruar sekretar në Ministrinë e Infrastrukturës. Kohë kjo kur kishte përplasje për pozitën e sekretarit me Izedin Bytyqin. Jetmir Alaj gjithashtu ishte pjesë e Ministrisë së Infrastrukturës.
Kurse, Blerim Dina, Nuhi Paçarizi e Goran Milenkoviq kanë qenë udhëheqës të OSHP-së.
Sa kanë pasuri?
E këta zyrtarë po del se kanë pasur goxha pasuri. Betim Reçica, dikur sekretar në Ministrinë e Infrastrukturës ka të deklaruar në Agjencinë Kundër Korrupsion shtëpi dhe truall në vlerë 280 mijë euro, banesë 58 mijë euro, truall 4 mijë euro dhe 2 mijë euro, banesë në emër të bashkëshortes në vlerë 76 mijë euro, veturë 8 mijë euro dhe motoçikleta. Reçica ka deklaruar të kursyera në bankë 2 mijë euro.
Valmira Bllaca, udhëheqëse e Zyrës së Prokurimit nuk ka deklaruar ndonjë pasuri të luajtshme dhe të paluajtshme. Ajo ka deklaruar 13 mijë euro para të kursyera nëpër banka.
Ish-sekretari tjetër Izedin Bytyqi ka deklaruar goxha pasuri gjithashtu në AKK. 125 mijë euro banesë, një banesë tjetër 114 mijë euro, banesë sërish në vlerë 101 mijë euro dhe 94 mijë euro, lokal 220 mijë euro, garazh 8 mijë euro dhe veturë 17 mijë euro.
Ish/zvministri Muhamet Gashi ka deklaruar banesë e tok dhe 3 mijë euro të kursyera.
Të pasur po dalin të jenë edhe ish-udhëheqësit e Organit Shqyrtues të Prokurimit. Blerim Dina ka deklaruar banesë 80 mijë euro, tokë 5 mijë euro, tokë 9 mijë e 500 euro, mal 17 mijë euro, tokë 11 mijë e 500 euro, shtëpi 30 mijë euro, shtëpi me oborr 150 mijë euro dhe veturë mbi 14 mijë euro.
Nuhi Paçarizi që ishte anëtar në OSHP për kohën kur akuzohet, ka deklaruar shtëpi në vlerë 120 mijë euro si pasuri të përbashkët. Banesë 66 mijë euro në emër të bashkëshortes, banesë 30 mijë euro, tokë 15 mijë euro, dhe dy hapësira toke nga 9 mijë euro. Kurse, veturën e ka deklaruar në vlerë 4 mijë euro.
Anëtari serb në OSHP, Goran Milenkoviq, ka deklaruar shtëpi 100 mijë euro në emër të fëmijëve, banesë 65 mijë euro, 32 mijë euro një tjetër banesë, veturë 5 mijë euro, dhe para të gatshme 15 mijë euro.
Personat e përmendur janë të pafajshëm deri në vendimin përfundimtar nga gjykata.
