Fondi i Kursimeve Pensionale e ka përmbyllur vitin 2021 me rezultat shumë të kënaqshëm nga investimet, me kthimin bruto që kap shumën prej +227 milionë euro.
Nga Fondi i Kursimeve Pensionale kanë njoftuar se rritja e çmimit të njësisë këtë vit ishte 10.65%, krahasuar me +3.03% në vitin 2020.
Njoftimi i plotë:
Të nderuar kontribuues
🔴Fondi i Kursimeve Pensionale i Kosovës e përmbylli vitin 2021 me rezultat shumë të kënaqshëm nga investimet, me kthimin bruto që kapi shumën prej +227 milionë euro. Kjo shifër nominale është më e larta prej themelimit. Ndërsa rritja e çmimit të njësisë këtë vit ishte 10.65%, krahasuar me +3.03% në vitin 2020. Në total mjetet pensionale u rritën sivjet me 365 milionë euro, për të arritur kështu në 2 miliardë e 353 milionë euro.
🟡Këtë vit për pensionimin e 5,400 përfituesve u paguan 68 milionë euro, ndërsa prej themelimit janë shpaguar 321 milionë euro për 64 mijë përfitues.
🟣Njëkohësisht, gjatë vitit 2021, përkundër pandemisë, institucioni arriti t’i ofroje më shumë se 160 mijë shërbime fizike në zyrë. Ndërsa shërbimet tona digjitale vazhduan së avancuari, me gati 275 mijë kontribuues që kanë llogari në eTrusti dhe me gjithsej 752 mijë e 586 llogari pensionale.
Me këtë rast, në këtë fillimviti, iu urojmë të gjithë kontribuuesve më të mirat më 2022! 🎉
