Në Kosovë, ndërhyrjet estetike si Botox dhe fillerët po përhapen me shpejtësi, por një pjesë e madhe e tyre ofrohet jashtë ligjit dhe pa mbikëqyrje profesionale. Injektimi i Botox-it, që nuk është i licencuar për asnjë subjekt juridik, vazhdon të kryhet ilegalisht, duke i ekspozuar qytetarët ndaj praktikave të pasigurta.
Përveç aspektit ligjor, rreziku qëndron te pasojat shëndetësore nga aplikimi joprofesional: infeksione, deformime, reaksione alergjike dhe dëmtime serioze. Mungesa e kontrollit dhe e standardeve rrit dyshimet për sigurinë e këtyre shërbimeve dhe efektivitetin e mbikëqyrjes institucionale.
Në muajin dhjetor, me autorizim të Prokurorisë Themelore në Prishtinë, Drejtoria e Hetimeve të Krimeve Ekonomike e Policisë së Kosovës, në bashkëpunim me Inspektoratin Shëndetësor, kishin zhvilluar një aksion të gjerë për kontrollimin e bizneseve që ofrojnë shërbimin e injektimit të Botox-it, pasi që asnjë subjekt juridik në Kosovë nuk është i autorizuar për ofrimin e këtij shërbimi.
Në mesin e subjekteve private shëndetësore të kontrolluara kishte qenë edhe subjekti privat shëndetësor “Revita Beauty Clinic” me pronare Besa Berisha Humolli.
Veriu.info ka siguruar një vendim të Inspektoratit Shëndetësor të datës 08.01.2026, me të cilin është gjobitur me 4 mijë euro kjo klinikë për shkelje të dispozitave të Ligjit për Shëndetësi.
Me procesverbalin e inspektorëve, të cilët ishin të shoqëruar edhe nga zyrtarët policorë të Krimeve Ekonomike, klinikës i ishte ndaluar ofrimi i shërbimeve shëndetësore të Botox-it dhe fillerëve.
Po ashtu, klinikës së Besa Berisha Humollit i ishte vendosur shenja e ndërprerjes së përkohshme të veprimtarisë.
Çka u konstatua gjatë inspektimit?
Në raportimin e inspektimit të siguruar nga Veriu.info, thuhet se në momentin e inspektimit “Revita Beauty Clinic” nuk posedonte licencë për ushtrimin e veprimtarive shëndetësore, madje as që kishte bërë një kërkesë të tillë.
Shkeljet e evidentuara në “Revita Beauty Clinic” nuk përfundojnë me kaq, pasi që inspektorët kanë konstatuar se themeluesja e kësaj klinike, Besa Berisha Humolli, nuk posedonte licencë si doktoreshë e stomatologjisë, pasi që një e tillë i kishte skaduar qysh në vitin e largët 2010.
Në “Revita Beauty Clinic” janë gjetur edhe një sasi e konsiderueshme e fillerëve dhe Botox-it, të cilat janë konfiskuar nga inspektorati farmaceutik.
Po ashtu, në “Revita Beauty Clinic” janë gjetur edhe formularë të plotësuar nga klientët për aplikim të Botox-it dhe fillerëve.
Revita e Besa, shtet në veti?
Veriu.info më 5 mars ka marrë përgjigje nga Ministria e Shëndetësisë, e cila konfirmon se “Revita Beauty Clinic” ka paguar gjobën e shqiptuar, por e njëjta mbetet e palicencuar për ofrimin e shërbimeve shëndetësore.
Pra, edhe përkundër që me procesverbal i ishte ndaluar ofrimi i shërbimeve shëndetësore të fillerëve dhe Botox-it, kjo klinikë ka vazhduar me ofrimin e shërbimit të injektimit të fillerëve.
Madje, pa pasur frikë nga shteti, e njëjta këto shërbime i ka bërë edhe publike në faqen e vet në Facebook.
Ironik duket fakt që kjo klinikë kishte ofruar zbritje për 8 mars për këtë shërbim ilegal, ushtrimin e të cilit e ka të ndaluar nga shteti.
“Revita Beauty Clinic” dhe institucione të tjera shëndetësore, për të cilat ka raportuar në vazhdimësi Veriu.info, janë shembuj se si ndalesat për ushtrimin e veprimtarive shëndetësore vendosen në letër nga Inspektorati Shëndetësor, por të njëjtat në praktikë vazhdojnë ofrimin e këtyre shërbimeve ilegalisht.
Veriu.info ka tentuar të marrë një qëndrim nga “Revita Beauty Clinic” për çështjet e ngritura, por deri në momentin e publikimit të artikullit nuk kemi pranuar përgjigje në pyetjet e dërguara.
LEXONI EDHE:
Raportimi për skandalin me mjek ilegal | Klinika Amerikane humbet rastin ndaj Veriu.info në KMShK
