Partia në pushtet, Lëvizja Vetëvendosje ka goditur ish-qeveritë e kaluara e individë të caktuar me një video të radhës.
Në një video të publikuar të martën, janë përmendur skandale të ndryshme të së kaluarës, si terminalet doganore, vjedhja e dy milionë eurove nga Thesari i Kosovës, vjedhja e drogës nga terminalet doganore, dhe shitja e tokave me 1 euro për ari, e të tjera zhvillime që janë renditur brenda kësaj videoje.
Në mesin e tyre, ishte edhe kreu i SBASHK-ut, Rrahman Jasharaj.
Duke e ilustruar fotografinë e Jasharajt menjë tekst kur flitet për sindikatat shantazhuese, në video thuhet se ka mbaruar koha kur të tilla shantazhe vinin për Qeverinë.
Pikërisht për këtë, Front Online ka kontaktuar Jasharajn.
Vendosjen e fotografisë së tij në video, Jasharaj e konsideron si imazh që përfaqëson sindikatat.
“Ata kanë të bëjnë me sindikatat por si emër pak më i njohur po them në publik si sindikalist jam unë dhe e kanë marrë fotografinë time, por po them që mundet me i pasë pak hatër mbetjet dhe inatet edhe në deklarimet e mia gjatë grevës, edhe në angazhimet e mija, dhe e kanë bërë si simbolik mbase figurën time. Kur del në një pamje figura ime konsiderohet se ka të bëjë me sindikatat”, u shpreh ai për Front Online.
Megjithatë, Jasharaj nuk i përjashton as inatet që mundet t’i ketë partia në pushtet.
Kjo, sipas tij për shkak të angazhimeve që i ka bërë vazhdimisht si kryesindikalist.
“Mbase në grevë se isha kryetar i Këshillit të Grevistëve, isha vazhdimisht edhe në media mundohesha të kisha takime, dhe e kam ngritur zërin aq sa kam ditur dhe kam mundur pasi e kam pasur detyrë dhe mbase është një hatërmbetje e tyre pse i kam bërë gjithë ato angazhime, nuk e kam bërë kundër dikujt por e kam bërë me qëllimin më të mirë”, tha ai për Front Online.
Pas kësaj videoja ka pasur reagime të shumta.
Shefi i Grupit Parlamentar të Partisë Demokratike të Kosovës, Abelard Tahiri, duke i konsideruar Vetëvendosjen dhe kryeministri Albin Kurti në gjendje të mjerueshme.
Ndërsa, ish kryeministri Avdullah Hoti tha ajo video e publikuar nga Lëvizja Vetëvendosje është fashizëm politik./Front Online/
