Liqeni i Ujmanit për më shumë se 20 vite ka qenë i pashfrytëzueshëm për shqiptarët e Kosovës për shkak të sigurisë. Përveç kësaj, pranë tij prej pasluftës ishin ndërtuar shumë vila pa leje në tokat e kompanisë ‘Ibër Lepenc’ përreth liqenit nga serbë të zonës.
Prej muajit të kaluar kompania publike ‘Ibër Lepenc’ ka nisur procesin e lirimit të pronave të saj, duke bërë rrënimin e disa vilave që ishin ndërtuar pa leje përmes uzurpimit të pronave.
Kompania ‘Ibër Lepenc’ duket se e ka marrë seriozisht lirimin e pronave të saj, ku para pak ditësh u ka dërguar një kërkesë për lirimin e pronave të uzurpuara disa uzurpatorëve, të cilët janë alarmuar për këtë situatë.
Veriu.info ka siguruar një komunikim që është bërë përkitazi me këtë kërkesë në një grup në WhatsApp me emërtimin ”Inati Serb – Koridori SB” (Српски Инат – Коридор СБ), ku ka edhe një paralajmërim kërcënues në mënyrë indirekte për kompaninë “Ibër Lepenc”.
“Në 11 adresa ka mbërritur kërkesa e kompanisë Ibër-Lepenc drejtuar serbëve që janë pronarë të shtëpive të vikendit (vilave) në liqenin e Gazivodës, që brenda një afati prej 15 ditësh ta lirojnë hapësirën, në të kundërtën ato do të rrënohen siç u bë edhe me të mëparshmet”, thuhet në mesazhin që ka shkruar një anëtar i këtij grupi.
Përveç që njofton grupin për kërkesën e lirimit të pronave, ai jep edhe një mesazh që duket se është kërcënues për kompaninë ‘Ibër Lepenc’.
”Nuk është shumë e mençur për këtë kompani që të shfaqë shumë forcë sepse janë shumë të cenueshëm”, thuhet në fund të këtij mesazhi të siguruar nga Veriu.info, të cilin mësohet se e posedon edhe Policia e Kosovës.
Çka thuhet në kërkesën e ‘Ibër Lepenc’?
Në dokumentin që është dërguar në këtë grup të WhatsApp, shkruan se ai është nënshkruar më 3 korrik nga Kryeshefi i ‘Ibër Lepenc’, Faruk Mujka, përmes të cilit iu kërkohet uzurpatorëve të pronave që të njëjtat t’i lirojnë brenda 15 ditësh, nën paralajmërimin që ndërmarrja do të veprojë vetë nëse nuk lirohen pronat.
“Në bazë të evidencave zyrtare dhe dokumentacionit të pronësisë, Ndërmarrja Publike Hidroekonomike “Ibër-Lepenc” Sh.A. është pronar ligjor i parcelës kadastrale nr. P-72508033-02631-2, me sipërfaqe prej 32,998 m^2, të regjistruar në Zonën Kadastrale Veli Breg, komuna e Zubin Potokut. Gjatë verifikimit në terren, është konstatuar se në këtë pronë shoqërore janë ndërtuar objekte (vile) nga persona të panjohur, pa leje dhe pa pëlqimin e pronarit ligjor, gjë që përbën uzurpim të paligjshëm të pronës”, thuhet në kërkesën e kompanisë ‘Ibër Lepenc’.
Tutje, me këtë kërkesë paralajmërohen uzurpatorët se ndërmarrja do të jetë e detyruar të ndërmarrë të gjitha veprimet juridike për mbrojtjen e të drejtave të veta, me qëllim lirimin e pronës, pa asnjë paralajmërim të mëtejshëm, me ç’rast të gjitha shpenzimet dhe pasojat juridike do të bien mbi ta.
Cenueshmëria e ‘Ibër Lepenc’?
Në mesazhin e dërguar nga një anëtar serb thuhet se ‘Ibër Lepenc’ është i cenueshëm, siç duket i referohet një ngjarje terroriste të ndodhur më 29.11.2024, ku kishte ndodhur një shpërthim me eksploziv TNT (20 kilogramë) në kanalin e kësaj ndërmarrjeje në fshatin Varagë të Zubin Potokut.
Për këtë sulm terrorist Prokuroria Speciale ka ngritur aktakuzë ndaj Jovan Viqentijeviq, Dragisha Viqentijeviq dhe Igor Dimoviqit.
