Zëdhënësi i Bashkimit Evropian, Peter Stano, e ka paralajmëruar Kosovën se rrezikon të mbetet e “vetme dhe mbrapa”, nëse nuk i dëgjon miqtë dhe aleatët e vet, pas veprimeve të fundit në veriun e vendit.
Lidhur me këtë çështje, në një prononcim për Gazeta Blic, deputeti nga Lëvizja Vetëvendosje, Agon Batusha, thotë se Stanos duhet rikujtuar deklaratat e Presidentit dhe Kryeministrit të Serbisë që nuk pranojnë planin franko-gjerman.
“Stanos duhet me ia kujtu që ka deklarata të Presidentit dhe Kryeministrit të Serbisë që nuk e pranojnë planin franko gjerman, Stanos duhet me ia kujtu që e ka një letër të ish kryeministres që ka thënë ne nuk e njohim as integritetin territorial, të Kosovës as marrëveshjen me Kosovën”, deklaroi ai.Deputeti përmendi rastin e Banjskës ku tha se kriminelët janë duke jetuar në vila luksoze në mes të Beogradit dhe ende nuk ka dënime nga BE.
“E kemi rastin e Banjskës ku kriminelët jetojnë midis Beogradit me vila luksoze dhe nuk ka asnjë proces dhe dënim prej Bashkimit Evropian. Pra, e kemi një shtet autokrat i cili edhe me raportet të BE-së është drejt autokracisë”, tha ai.
Sipas Batushës, më e pakta që mund të thuhet për këto deklarata është se janë për keqardhje qëndrimet që po mban BE.“Nuk kemi asnjë qortim nga ana e Stanos dhe zyrtarëve të BE-së në mënyrë deklarative, e në anën tjetër një shtet demokratik i cili po i mbron vlerat evropiane, i cili po e zbaton marëveshjet e arritura po në Bruksel me ndërmjetësimin e Bashkimit Evropian, e i cili po e ushtron të drejtën e vetë legjitime brenda territorit të vetë, atëherë po kemi kësilloj deklarata, e cila më e pakta që mund të thuhet janë për keqardhje për situatën dhe qëndrimet që po i mban BE, i cili vlerat e veta po i kundërshton”, theksoi ai.
Për në fund, deputeti i VV-së tha se këto qëndrime të BE-së ledhatuese ndaj Serbisë e qortuese ndaj Kosovës nuk dërgojnë askund.“Këto qëndrime të Bashkimit Evropian ledhatuese ndaj Serbisë dhe qortuese ndaj Kosovës apo kërcënuese nuk çojnë askund e mund të shihen edhe si dekurajim i qytetarëve në aspektin e integritetit të diplomacisë së BE në Ballkanin Perëndimorë”, përfundoi deputeti i VV-së, Agon Batusha.
