Kompania ndërtimore “Bytyqi Ing Sh.p.k” ku humbi jetën punëtori 34-vjeçar kishte kohë që operonte në kundërshtim me ligjin. Dokumentet e siguruara nga Gazeta Insajderi zbulojnë se biznesi i drejtuar nga Naser Bytyqi ishte gjobitur disa herë për shkelje të rënda të sigurisë në punë dhe kishte marrë urdhër nga Inspektorati për ndërprerjen e punimeve, por punimet kishin vazhduar pa asnjë ndërprerje.
Gazeta Insajderi ka siguruar dokumente zyrtare që zbulojnë një zinxhir të gjatë neglizhencash nga kompania ndërtimore “Bytyqi Ing Sh.p.k”, e cila ka operuar në kundërshtim me Ligjin për Sigurinë dhe Shëndetin në Punë. Pavarësisht gjobave të njëpasnjëshme, paralajmërimeve dhe urdhrit për ndalimin e punimeve, kompania ka vazhduar aktivitetin e saj deri në humbjen e jetës së një punëtori 34-vjeçar në Prizren.
Dosja e inspektorëve tregon se pronari i kompanisë, Naser Bytyqi – i cili aktualisht ndodhet në paraburgim, si person përgjegjës ka anashkaluar vendimet dhe gjobat e Inspektoratit të Punës. Dokumentet e siguruara nga Insajderi tregojnë se ndaj kompanisë kishte një vendim për ndërprerjeje e punimeve.
Kompania kishte bërë këto shkelje: mungesë skelesh të sigurta, mungesë pajisjesh mbrojtëse, rrethim i papërshtatshëm i zonës së punimeve dhe pune që zhvillohej në kushte të rënda të rrezikshmërisë.
Inspektorati i Punës kishte shqiptuar edhe tri gjoba ndaj komopanisë
Vendimet e Inspektoratit të Punës të datuara muajt e fundit tregojnë se kompania e familjes Bytyqi ishte gjobitur disa herë. Në secilin rast, inspektorët kanë konstatuar mungesë të plotë të masave mbrojtëse në vendpunishte dhe kanë shqiptuar gjobat prej 3 mijë euro.
Në njërin nga vendimet, inspektorët e Punës urdhëronin ndërprerjen e menjëhershme të punimeve, deri në vendosjen e pajisjeve dhe masave mbrojtëse. Por dokumentet tregojnë se ky urdhër nuk u respektua nga kompania, e cila vazhdoi punën në të njëjtin objekt në Prizren.
Rënia nga skelet e punëtorit 34-vjeçar
Mospërfillja e masave të sigurisë, e dokumentuar për muaj me radhë nga inspektorët, kulmoi me një ngjarje tragjike. Një punëtor 34-vjeçar humbi jetën pasi ra nga skeleti i objektit ku kompania “Bytyqi” po kryente punime. Pikërisht për mungesën e këtij skeleti dhe masave tjera të sigurisë, kompania ishte gjobitur në inspektimet paraprake.
“Objekti nuk posedon skele dhe ka mungesë të masave të sigurisë” thuhet në arsyetimin e vendimit për gjobë të dhënë me datën 06.10.2025. Vetëm dy javë më pas, vdiq punëtori pasi u rrëzua nga lartësia.
Naser Bytyqi, pronari i kompanisë ndodhet në paraburgim
Pas vdekjes së punëtorit, Prokuroria dhe Policia kanë ndërhyrë menjëherë, ndërsa Gjykata Themelore e Prizrenit ka caktuar 30 ditë paraburgim për pronarin e kompanisë, Naser Bytyqi. Ai dyshohet për veprën penale:
“Asgjësimi, dëmtimi apo heqja e pajisjeve mbrojtëse dhe rrezikimi i sigurisë në vendin e punës”, sipas nenit 358 të Kodit Penal të Kosovës.
Sipas njoftimit të gjykatës, masa e paraburgimit është caktuar më 31 tetor 2025 dhe do të zgjasë deri më 29 nëntor 2025.
Sipas të dhënave të ARBK-së, pronar i regjistruar i kompanisë është Shqiprim Bytyqi, megjithëse Naser Bytyqi figuron si person përgjegjës dhe menaxher operativ.
Si ndodhi vdekja e punëtorit në vendin e punës?
Nga të dhënat e siguruara nga Insajderi, më 29 tetor 2025, rreth orës 13:00, në një kompleks banesor në Prizren, një punëtor humbi jetën pasi ra nga kati i pestë i objektit gjatë kryerjes së punimeve ndërtimore. Viktima është identifikuar si Faik Mehmetaj, 34 vjeç.
Hetimet paraprake tregojnë se punëtori nuk kishte qenë i pajisur me masat mbrojtëse të nevojshme për siguri në punë.
Sipas Prokurorisë, i pandehuri Bytyqi, si person përgjegjës për sigurinë në vendin e punës, kishte dështuar të instalonte pajisjet mbrojtëse dhe të siguronte trajnimin e punonjësve.
Në momentin e rënies, Mehmetaj kishte humbur ekuilibrin në shkallët e skeletit të objektit dhe kishte rënë nga një lartësi prej rreth 15–20 metrash, duke pësuar lëndime të rënda trupore. Ai ishte dërguar me urgjencë në QKUK, por kishte ndërruar jetë disa orë më vonë.
