Ka vdekur në QKUK Bajram Babiqi, 66-vjeçari, i cili javë më parë ishte plagosur nga një zyrtar i Policisë së Kosovës, gjatë një bastisje që po zhvillohej në pronën e tij në Prishtinë.
Ai ka vdekur rreth orës 14:30, në ditën e 24 në mjekimin intensive të Qendrës Klinike Universitare të Kosovës.
Lajmin e ka konfirmuar mjeku kujdestar në mjekimin intenziv në QKUK Lavdim Morina.
Policia e Kosovës gjatë një bastisje të zhvilluar më 8 maj 2022 në Prishtinë, ka hasur në rezistencë nga tashmë i ndjeri, i cili më pas kishte pësuar lëndime si rezultat i plagosjes nga ana e një zyrtari policor.
“Pas disa të shtënave me armë zjarri të raportuar më parë, policia me autorizimin e Prokurorit të Shtetit, ka bërë kontrollimin e shtëpisë dhe objekteve përcjellëse të dyshuarit mashkull kosovar. I dyshuari ka kanosur me armë zjarri zyrtarët policorë duke ua kanosur jetën drejtpërdrejtë, me ç rast në vetëmbrojtje dhe për të vënë situatën nën kontroll njëri nga zyrtarët ka përdorur armën ndaj të dyshuarit”, thuhej në raportin e policisë.
Si dëshmi materiale policia pati sekuestruar: pesë pistoleta, një AK-47, 694 copë fishekë të kalibrave të ndryshëm, 58 gëzhoja dhe 4 predha.
