Shefja e Grupit Parlamentar të LVV-së, Mimoza Kusari-Lila e ka quajtur “të pavlefshme” deklaratën e Arben Gashit, homologut të saj nga Lidhja Demokratike, i cili të mërkurën paralajmëroi prishjen e koalicionit qeverisës në vjeshtë.
Në një intervistë televizive të mërkurën, Gashi i LDK-së tha se janë të paktën tetë deputetë nga Lëvizja Vetëvendosje të cilët dëshirojnë t’i bashkëngjitën Grupit Parlamentar të Lidhjes Demokratike të Kosovës.
Kusari-Lila për Paparacin ka thënë se nuk ka asnjë informatë të kësaj natyre, derisa ka thënë se nuk ka pasur shprehje të vullnetit e as paknaqësi nga deputetët e LVV-së.
“Skam asnjë informatë të asaj natyre, nuk ka pasur as shprehje të vullnetit as pakënaqësi të dikujt në grup për me qenë kjo deklaratë e vlefshme, nga ana jonë pra situate është në rregull”, ka thënë Kusari-Lila.
Megjithatë dje ka pasur përplasje ndërmjet deputetes Duda Balje dhe atij të LVV-së Armend Muja, pasi që ky i fundit ka kërkuar përjashtimin e deputetes Balje nga Komisioni Hetimor për Energjinë.
Por, për ta sqaruar tërë situatën e krijuar deputetja Balje ka thënë të mërkurën se po e pret kryeministrin Albin Kurti që të kthehet nga SHBA-ja për të diskutuar çështjen e koalicionit.
Balje ka thënë se ajo nuk është punëtore e VV-së, por sipas saj, kjo përplasje nuk do të ndikojë që të prishet koalicioni mes partisë së saj dhe VV-së, duke thënë se çfarë ka thënë dhe tentuar Muja, është veçse mendim i tij.
“Unë nuk jam punëtore e VV-së, jam deputete dhe kam mendimin tim personal. E respektoj partnerin e koalicionit, ka disa momente, p.sh kodi civil, trusti, tash në komision hetimor për mua nuk është e logjikshme…. kam mendimin personal. Ata po duan me më zëvendësua mua me dikë tjetër nga grupi parlamentar multietnik. Taman puna me prishë koalicionin për shkak të mendimit të Armend Mujës. Kurrë, ai është mendim i tij personal”, ka deklaruar ajo.
Ligjëvënësi Gashi të mërkurën deklaroi se në vjeshtë do të ketë një rritje të opozitë-bërjes së LDK-së.
Në këtë periudhë kohore, ai shtoi se Qeveria Kurti 2 mund të bie nga pushteti, teksa nuk dha detaje tjera.
“Deri në zgjedhjet lokale, ka qenë ideja që ne me duhet të shohim se si të rikthehemi dhe stabilizohemi. E para, qeveria i ka marrë 50 për qind të votave, duhet të ia lëmë një kohë atyre të qeverisin, të jemi proaktiv dhe propozues për çdo temë. Albini na ka thonë unë i kom 70 deputetë, mendoj se koha e Kurtit për një qeverisje komode, i ka skaduar. I ka bërë dy vjet qeverisje”, theksoi Gashi.
