Një episod dhune ka ndodhur në Itali ndaj një vajze të re gjatë kohës që ajo po stërvitej në palestër. Siç shkruajnë mediat, një 50-vjeçar shqiptar ka sulmuar 25-vjeçaren.
Ngjarja ka ndodhur në ambientet e palestrës teksa e reja dhe shqiptari ishin në një nga pajisjet me pesha. Siç duket në videot e publikuara në mediat italiane, të dy po stërviteshin në sektorin ku gjendeshin peshat.
Të dy ata përfshihen në diskutim dhe në moment e sipër pas debatit, shqiptari e godet me një nga peshat që kishte në dorë.
Vajza përpiqet që të largohet por merr një goditje në fytyrë dhe rrëzohet në tokë. Pas kësaj ai e godet me shkelma. Ndërhyrja e një klienti bën që vajza të fitojë kohë dhe të largohet.
Por ndiqet sërish nga shqiptari, i cili tashmë merr një shufër hekuri dhe përpiqet ta godasë me të.
Sipas një dëshmitari, në momentin e ngjarjes kanë qenë të pranishëm jo më shumë se 10 veta. Vajza u mundua të fshihej në një kuzhinë pas lokalit të palestrës, por edhe aty u ndoq nga burri. Ky i fundit u ndalua nga disa persona.
Ndërsa më vonë ndërhyri policia dhe e arrestoi shqiptarin. Mësohet se 50-vjeçari, identiteti i të cilit nuk bëhet i ditur, ishte roje sigurie në disa lokale nate në zonën bregdetare të Peskarës./tvklan.al
