Presidentja e vendit, Vjosa Osmani do të vazhdojë të jetë në krye të Presidencës pavarësisht raportimeve se Gjykata Kushtetuese mund ta rrëzoj për shkak të ankesës së kandidatit për deputet, Veton Berisha.
Kështu të paktën ka deklaruar për Gazeta Blic drejtori i Institutit për Afirmimin e Marrëdhënëieve Ndëretnike, Fatmir Sheholli.
Ai duke referuar burime brenda Gjykatës Kushtetuese ka theksuar se Vjosa Osmani nuk do të preket nga vendimi i instancës më të lartë gjyqësore në vend.
Sipas tij, as deputeti Veton Berisha nuk do të mund të hyjë në Kuvend, por vetëm do të kompensohet.
“Vjosa Osmani nuk do të preket nga vendimi i Gjykatës Kushtetuese, pra ajo do ta vazhdojë mandatin deri në fund. Në anën tjetër, as deputeti Veton Berisha nuk do të jetë pjesë e kësaj legjislatur dhe se vetëm do të kompensohet”, thotë ai për Gazeta Blic.
Ndryshe, vendimi i Gjykatës Kushtetuese pritet të bëhet publik ditëve në vijim.
Pas raportimeve të mëdiave se mund të rrëzohet presidentja Vjosa Osmani ka pasur reagime të shumta.
Madje, shefi i kabinetit të presidentes, Blerim Vela ka akuzuar rëndë mediat, duke e quajtur edhe si tentim puç ndaj institucioneve.
Ndërsa, njëri nga bashkëpunëtorët më të afërt të presidentes Vjosa Osmani, Faton Peci ka folur të enjten për Gazeta Blic pas raportimeve në media se Gjykata Kushtetuese mund ta rrëzoj të parën e shtetit, për shkak se dy kandidatë për deputetë kanë bërë ankesa në instancën më të lartë gjyqësore në vend.
Ministri i Bujqësisë ka theksuar se nëse do të ndodhtë një skenar i tillë, pra nëse Gjykata Kushtetuese do ta rrëzonte Osmanin, “ky në fakt është skenar i Serbisë për destabilizim institucional të Kosovës”.
Ai ka theksuar se treshja drejtuese e vendit: presidentja Vjosa Osmani, kryeministri Albin Kurti dhe kryekuvendari, Glauk Konjufca janë më unik se kurrë.
“Tre krerët e institucioneve Osmani, Kurti dhe Konjufca bashkëpunojnë e funksionojnë sot njësoj si më 4 prill 2021 kur u zgjodh Presidentja Vjosa Osmani në Kuvendin e Republikës”, tha ai për Gazeta Blic.
Sipas tij, “sulmi mbi cilindo prej tyre është sulm mbi të tre, mbi të gjithë ne, e para së gjithash mbi shtetin demokratik e pushtetin e ri”.
“Një veprimi të tillë me siguri do t’i gëzohej Beogradi zyrtar, sepse ky në fakt është skenar i Serbisë për destabilizim institucional të Kosovës”, vlerëson ministri Peci.
Peci ka kritika edhe opozitën kosovare, duke u dërguar mesazh që të mësohen të jenë në rolin e opozitës dhe të pushojnë me sabotime.“Ndërkaq atyre në Kosovë që populli ua mori fuqinë me votën e lirë, ata duhet të mësohen me punën në opozitë dhe të pushojnë me insinuatat e sabotimet”, thotë ai
