Derisa për Ukrainën, Moldavinë, Malin e Zi dhe Shqipërinë 14 korriku 2026 ishte një “ Super e Martë”, për Kosovën pa institucione e cila prej dy vitesh përpëlitet mes krizash politike, ishte thjeshtë një ditë e zakonshme vere.
Komisionerja për Zgjerim e BE-së, Marta Kos, ka pritur të martën në Bruksel përfaqësues të këtyre katër shteteve për t’ua konfirmuar progresin e tyre në rrugën drejt anëtarësimit në BE, ndërkohë që Kosova pret prej vitesh për të marrë statusin e vendit kandidat.
Kryeministri i Kosovës, Albin Kurti, e kishte dorëzuar aplikimin në Bruksel qysh në vitin 2022 përgjatë presidencës çeke në Këshillin Evropian, e që prej asaj kohe asgjë s’ka ndodhur. Thirrje e liderëve shtetërorë të Kosovës drejt BE-së për avancimin e aplikimit të Kosovës kanë qenë të shumta, megjithatë pa sukses.
Por a pritet që të ketë ndonjë zhvillim pozitiv sa i përket marrjes së statusit të vendit kandidat katër vite pas, kur me presidencën e BE-së po udhëheqë Irlanda.
Një zëdhënëse e Presidencës irlandeze në një përgjigje për Gazetën Express ka thënë se Irlanda do të mbështesë drejtë anëtarësimit edhe vendet si Kosova që janë kandidate potenciale, por qartësojnë se një gjë të tillë mund ta bëjnë kur kushtet e lejojnë dhe kur zbatohen të gjitha reformat e nevojshme.
“Irlanda mbështet fuqimisht zgjerimin e BE-së, i cili është një prioritet kyç për Presidencën tonë të BE-së. Irlanda do të mbështesë progresin e të gjitha vendeve kandidate dhe kandidate potenciale, përfshirë Kosovën, drejt anëtarësimit në BE, aty ku kushtet e lejojnë dhe me kusht që të zbatohen të gjitha reformat e nevojshme. Qasja e Irlandës ndaj zgjerimit të BE-së është përcaktuar në programin e politikave të Presidencës sonë”, kanë thënë për Express nga Presidenca Irlandeze.
Kosova për shkak të bllokadës së vazhdueshme institucionale s’ka arritur të shfrytëzojë Planin e Rritjes, plan miliona eurosh përmes të cilit BE-ja ka përkrahur vendet e Ballkanit Perëndimor. Analistja kosovar, Donika Emini, duke folur të martën për Express rreth kësaj teme, ka thënë se progresi në rrugën drejt BE-së, nuk arrihet vetëm duke kërkuar, por me punë të vërtetë. Ajo ka thënë se dështimi për të kapitalizuar Planin e Rritjes, është edhe një nga arsyet e ngecjes së Kosovës në rrugën drejt integrimit. Sipas Eminit, Kosova aktualisht është vendi me më së pakti peshë në agjendën e BE-së.
