Në fushë shpërthen me shpejtësinë dhe teknikën e një lojtari të lindur për të mahnitur botën. Lamine Yamal, talenti 17-vjeçar i Barcelonës dhe përfaqësues i Spanjës, vazhdon të tërheqë vëmendjen me paraqitjet e tij të jashtëzakonshme.
Ndeshja e fundit ndaj Interit në Ligën e Kampionëve (3-3), ku ishte protagonist absolut, vetëm sa i ka forcuar bindjet se ky djalosh është kandidat serioz për Topin e Artë, edhe pse ende nuk ka mbushur 18 vjeç.
Por përtej golave, asisteve dhe krahasimeve me legjenda si Lionel Messi apo Cristiano Ronaldo, Lamine Yamal ka një histori në vete.
Emri i plotë i tij është Lamine Yamal Nasraoui Ebana.
“Nasraoui” është mbiemri i babait, ndërsa “Ebana”, i nënës. Por ajo që bie në sy, është emri që ai mban në fanellë dhe që po njihet, Lamine Yamal.
Sipas gazetës spanjolle, ky nuk është një emër që i është trashëguar nga familja, por një premtim i mbajtur.
Në një kohë të vështirë, babait të Yamal, dy burra i ndihmuan të paguante qiranë. Me këtë rast babi i Yamal premtoi se nëse një ditë do të kishte një djalë, do t’ia vendoste emrin, Lamine dhe Yamal, si shenjë falënderim për dy burrat.
