Janina Ymeri nga LDK ka reaguar ashpër ndaj ministres në detyrë të Ekonomisë, Artane Rizvanolli duke e akuzuar se po shmang transparencën dhe përgjegjësinë për skandalet në sektorin energjetik gjatë viteve të qeverisjes Kurti.
Ymeri fillimisht e falënderon ministren për “aktivizimin e vonshëm” rreth lidhjeve të kompanisë EFT dhe tregtisë së energjisë me biznese serbe, por thotë se është e papranueshme që institucionet e pavarura “aktivizohen në mesnatë e ditë pushimi vetëm kur i intereson Vukvendosjes”.
Ajo kërkon publikimin e plotë të kontratave të importit dhe bartjes së energjisë, jo vetëm për 28 Nëntor, por për gjithë periudhën e mandatit të Rizvanollit, për të zbuluar sa ka përfituar EFT përmes stërshitjes së kapaciteteve ndërkufitare dhe çfarë roli ka pasur NOA Energy Trading si ndërmjetëse e transaksioneve.
Ymeri thotë se ministrja e ka njohur prej vitesh rolin e NOA Energy Trading duke i rikujtuar se vite të tëra importi janë bërë përmes kësaj kompanie dhe EFT-së duke ngritur dyshime për lidhje të mundshme transaksionesh.
Ajo e akuzon ministren se po e përzien qëllimisht “stërshitjen e kapaciteteve ndërkufitare” me importin e rrymës për të shmangur përgjegjësinë, ndërsa thekson se si vend pa kapacitete të mjaftueshme energjetike, Kosova ka humbje të mëdha teknike dhe komerciale që i detyrojnë institucionet të importojnë energji vazhdimisht.
Ymeri ngre edhe çështjen e trajtimit preferencial të veriut duke thënë se ndërsa Elektroprivreda Srbije sjell energji në Kosovë, qytetarët në veri nuk kanë pësuar rritje të çmimeve sa pjesa tjetër e vendit. “Pse qytetarët e Kosovës paguajnë rritjen e rrymës çdo herë, ndërsa të tjerët brenda vendit jo?”, pyet ajo.
Në fund, Ymeri kërkon nga ministrja përgjegjësi për dështimet në KEK, rritjet e shpeshta të çmimit të energjisë, krizën energjetike që ka goditur ekonominë dhe mosvendosjen e elektrofiltrave duke theksuar se qytetarët vazhdojnë të thithin gazra toksikë për shkak të neglizhencës qeveritare.
Ajo shprehet e gatshme për debat publik “në cilindo medium”, me dokumente dhe të dhëna teknike, pavarësisht se – sipas saj – përfaqësues të ZRRE kanë refuzuar një debat të mëparshëm në T7. Ymeri paralajmëron se dita-ditës do të dalin fakte të reja për prodhimin, humbjet, kapacitetet dhe pasojat mjedisore të sektorit energjetik duke akuzuar qeverinë se ka punuar në favor të aktorëve të caktuar dhe jo të interesit publik.
