Partitë politike përveç koalicioneve parazgjedhore, tashmë kanë nisur t’i diskutojnë emrat e mundshëm të kandidatëve për deputetë dhe përbërjen e listave të tyre sa i përket zgjedhje të jashtëzakonshme parlamentare të 28 dhjetorit.
Por ndryshe nga zgjedhjet e 9 shkurtit, ku shumë parti politike kishin nominuar edhe kryetarët e komunave si kandidatë për deputetë, kjo gjë duket se nuk do të ndodhë edhe në zgjedhjet e 28 dhjetorit.
Të paktën, disa kryetar aktual të komunave të vendit, tashmë kanë konfirmuar se nuk do të jenë kandidat për deputet në zgjedhjet e ardhshme.
Kryetari i Ferizajt, Agim Aliu, ka konfirmuar se nuk do të jetë pjesë e listës së Partisë Demokratike të Kosovës (PDK) për zgjedhjet parlamentare të 28 dhjetorit.
Ai tha se mbetet i përkushtuar ndaj mandatit që ka marrë në krye të komunës dhe se e konsideron këtë përgjegjësi si një besim të rëndësishëm qytetar.
“Jo nuk do të jem kandidat për deputet. Unë sapo kam marr mandatin e kryetarit të komunës dhe do të qëndroj besnik sepse e vlerësoj shumë këtë detyrë dhe besim qytetar,” u shpreh Aliu.
Ai shtoi se PDK, e udhëhequr nga Bedri Hamza, ofron një alternativë të duhur për zgjedhjet e ardhshme parlamentare.
“Po besoj se PDK me në krye me z. Hamza është oferta më e duhura. Oferta jonë do të mbështetet nga gjithë qytetarët e Kosovës,” theksoi ai për FrontOnline
Aliu paralajmëroi gjithashtu se në listën e përgjithshme të PDK-së për zgjedhjet e 28 dhjetorit do të ketë emra të rinj, duke sinjalizuar hapjen e partisë për figura të reja.
“Patjetër që do të ketë emra të rinj që do të janë të propozuar në listën e përgjithshme të PDK-së për garën e 28 dhjetorit,” tha ai.
Sekretari i përgjithshëm i Lidhjes Demokratike të Kosovës LDK dhe kryetari i Lipjanit, Imri Ahmeti, ka mohuar mundësinë e kandidimit të tij për deputet në zgjedhjet e 28 dhjetorit.
I pyetur nëse do të jetë pjesë e listës zgjedhore të LDK-së, Ahmeti u shpreh qartë se nuk do të kandidojë, duke theksuar se tashmë ka marrë mandatin e kryetarit të komunës dhe është i fokusuar në detyrat lokale.
“Jo nuk jam. Jo, jo. Tash i kemi pasur zgjedhjet për kryetar komune, tash pritet me pas betimin. Kemi hyrë tash në komunë dhe besoj se nuk duhet të kandidohem”, deklaroi Ahmeti.
A do të jetë kandidat për deputet? Flet Bali Muharremaj
Kryetari i Suharekës, Bali Muharremaj, ka thënë se ende nuk ka marrë një vendim nëse do të kandidojë për deputet nga radhët e Aleancës për Ardhmërinë e Kosovës (AAK).
Muharremaj theksoi se është herët për të folur për kandidaturën e tij dhe se vendimi do të merret vetëm prej tij.
“Nuk kam vendos ende nëse do të jem kandidat i AAK për deputet apo jo, është herët me folë. Nuk vendos qendra për mua, unë vendosi për vete, por akoma nuk kam vendosur”, u shpreh
Kryetari i Podujevës, Shpejtim Bulliqi, ka hezituar të flasë rreth mundësisë së kandidimit të tij për deputet nga radhët e Lëvizjes Vetëvendosje, duke kërkuar që pyetjet të adresohen te strukturat e partisë ose te zyrtarët komunalë.
I pyetur nëse do të jetë kandidat për deputet në zgjedhjet e 28 dhjetorit, Bulliqi nuk dha përgjigje të drejtpërdrejtë dhe theksoi se aktualisht është i zënë dhe se për këtë duhet pyetur qendra e VV-së në Podujevë ose me VV-në në Prishtinë.
“A ka mundësi me fol me zëdhënësin e komunës ose me fol në parti atje, ose me kryetarin e LVV-së në Podujevë. Është mire me thirrë kryetarin e qendrës së VV-së në Podujevë. A ka mundësi në parti LVV-në në qendër. A ju përshëndes se jam pak i zënë”, u shpreh Bulliqi.
