Një numër më i madh pjesëtarësh të policisë ndodhen brenda zonës së rrethuar të rrugës pranë Komisionit Republikan të Zgjedhjeve dhe Presidencës së Serbisë, në qendër të Beogradit.
Gazetarët e Radios Evropa e Lirë kanë vërejtur se në atë zonë janë lejuar të kalojnë disa furgonë dhe një automjet me pjesëtarë të Xhandarmërisë.
Kjo pjesë e qytetit vazhdon të jetë e mbyllur për qarkullimin e automjeteve dhe këmbësorëve.Zgjedhjet e sotme të parakohshme parlamentare në Serbi shihen si një nga sfidat më të mëdha për pushtetin 14-vjeçar të Aleksandar Vuçiqit dhe Partisë Përparimtare Serbe (SNS). Përballë tyre është një lëvizje studentore, e cila u forcua përmes protestave masive kundër korrupsionit.Protestat u nxitën nga shembja e strehës së stacionit hekurudhor në Novi Sad më 1 nëntor 2024, ku humbën jetën 16 persona. Protestuesit kërkuan përgjegjësi dhe i akuzuan autoritetet për korrupsion. Qeveria i hodhi poshtë akuzat, ndërsa procedurat gjyqësore për përcaktimin e përgjegjësisë ende nuk kanë përfunduar.Studentët nuk kanë udhëheqës formalë. Lista e tyre zgjedhore përbëhet nga figura jopartiake, shumica profesorë universitarë, ndërsa fushata e tyre është përqendruar te lufta kundër korrupsionit.Në garë për 250 vende në Parlament janë gjithsej 18 lista, përfshirë dy koalicione opozitare me përfaqësim në legjislaturën e kaluar: një proevropian dhe një të krahut të djathtë, me qëndrime euroskeptike. Vuçiq, i cili dha dorëheqje nga posti i presidentit në fund të shtatorit, synon të kthehet në postin e kryeministrit.Lëvizja studentore e ka lënë politikën e jashtme në plan të dytë, por ka përsëritur kundërshtimin ndaj njohjes së pavarësisë së Kosovës. Në një dokument të publikuar në maj, studentët thanë se “ruajtja e Kosovës është emëruesi i përbashkët i të gjitha përpjekjeve të tyre”. Ata kanë kundërshtuar edhe sanksionet ndaj Rusisë.Vuçiq, ndërkohë, është zotuar ta vazhdojë kursin e deritanishëm të politikës së jashtme: lidhje të ngushta me Moskën dhe Pekinin, krahas synimit të deklaruar për anëtarësim në Bashkimin Evropian./REL
