Ka përfunduar dëshminë dëshmitari Skender Zhitia në Dhomat e Specializuara të Kosovës (DhSK) në Hagë në procesin gjyqësor ndaj Hashim Thacit, Kadri Veselit, Rexhep Selimit dhe Jakup Krasniqit.
Dëshmitari tha se populli shqiptar mburret me UÇK-në dhe djemtë të cilët e kanë themeluar atë, raporton “Betimi për Drejtësi”.
“Ushtria Çlirimtare e Kosovës-organizatë politike dhe ushtarake është projekti më i suksesshëm i kombit shqiptar në shekullin XX. UÇK jo vetëm që dinë me organizu luftë të drejtë e të nevojshme, por ka organizu dhe udhëheqë luftë të domosdoshme për ekzistimin e popullit shqiptar në trevat e veta dhe me luftën e vetë të drejtë ka arrit me e ba aleat edhe forcën kryesore siç ka qenë NATO. Ushtria Çlirimtare e Kosovës me këtë luftë e ka bërë epokën e vetë. Populli shqiptar mburret me UÇK-në dhe me ata djem që e kanë themelu UÇK-në. Drejtuesit e UÇK-së janë një emblemë që do të rrezatojë gjithmonë edhe në historiografinë shqiptare”, tha dëshmitari Zhitia duke u përgjigjur në pyetjet e mbrojtjes së Krasniqit.
Pas përfundimit të pyetjeve të mbrojtjes së Krasniqit, pyetje shtesë për dëshmitarin pati serish prokurorja Silvia D’Ascoli lidhur me metodologjinë që ai kishte përdorur në librin e tij.
Me kaq përfundoi dëshmia e këtij dëshmitari si dhe seanca e sotme u krye për të vazhduar më pas nesër me dëshmitarin e radhës.
Dëshmitari Zhitia: Nuk kam pasur asnjëherë kontakt me Jakup Krasniqin
(Përditësuar, ora 16:22)- Dëshmitari Skender Zhitia, gjatë dëshmisë në Hagë ka thanë se asnjëherë nuk ka pasur kontakt me Jakup Krasniqin.
“E saktë, nuk kam pas asnjëherë kontakt”, tha Zhitia duke u përgjigjur në kundërpyetjet e avokates së Krasniqit, Shyamala Alagendra.
Ndërsa për librin e Krasniqit, dëshmitari tha se pasi që ka qenë i botuar, ia ka dhënë vetes të drejtën që t’i referohet por që nuk e di se cila nga pjesët është e ekzagjëruar, raporton “Betimi për Drejtësi”.
I pyetur nëse e kishte përcjellë dëshminë e Rrustem Mustafës në këtë rast, Zhitia tha se nuk ka pasur mundësi për shkak të disa ngjarjeve familjare, por që i ka parë disa pjesë.
Kur u pyet se a pajtohet me deklaratën e Mustafës se lufta e UÇK-së ka qenë më shumë propagandistike sesa operacionale, dëshmitari tha se nuk ka koment për këtë.
“S’kam koment. S’muj dha mendim për deklarata të personave që kanë përgjegjësi. Nuk kam autoritet për me dhanë mendim për deklarata që ka dhënë Rrustem Mustafa”, tha dëshmitari Zhitia.
Duke u përgjigjur në pyetjet e avokates së Thaçit, Sophie Menegon, dëshmitari tha se Zona Operative e Llapit ka marrë donacione vazhdimisht nga qytetarët, si uniforma e të tjera.
Ai tha se emërimet që ishin bërë në gusht ishin iniciativë e Rrustem Mustafës pa ndonjë urdhër nga lart.
“Ishte ndër zonat e mirëorganizuara dhe me iniciativa të ndryshme që kanë ndihmuar që ajo të organizohet në nivel më të mirë. Ndërsa, sa i përket çështjes tjetër ‘vetëorganizimi’ është çështje që unë nuk mund ta komentoj dhe ta them, por besoj që iniciativat kanë qenë të nisura nga Komandanti i Zonës Operative të Llapit, Rrustem Mustafa pa marrë ndonjë urdhër më lartë ose ndonjë iniciativë më lartë. Është fjala në raste të veçanta”, tha Zhitia.
Dëshmitari tha se në vizitat e Shtabit të Përgjithshëm të UÇK-së në Zonën e Llapit nuk ka qenë pjesëmarrës. Kurse, theksoi se emërimet janë bërë nga Remi.
“Në Zonën Operative të Llapit personat në pozitat e ndryshme komanduese janë emëruar nga komandant Remi më 18 korrik 1998 dhe mund t’i referoheni të dhënave në librin tim”, tha ai
Dëshmitari mohoi se ka qenë pjesë e delegacionit ose procesit në Rambuje, si dhe tha që nuk iu kujtohet se ka diskutuar për këtë çështje me ndonjë prej të intervistuarve në librin e tij.
Pyetje për dëshmitarin nuk pati mbrojtja e Selimit dhe as ajo e Veselit.
Zhitia: Nuk e kam pas fatin t’i takoj anëtarët e Shtabit të Përgjithshëm të UÇK-së gjatë luftës
(Përditësuar, ora 13:20)- Dëshmitari Skender Zhitia ka thënë se nuk e ka pasur fatin që gjatë luftës t’i takojë ndonjërin nga anëtarët e Shtabit të Përgjithshëm të Ushtrisë Çlirimtare të Kosovës (UÇK).
Këtë deklarim, dëshmitari e bëri duke u përgjigjur në pyetjet e mbrojtjes së Hashim Thaçit, përmes avokates Sophie Menegon.
“Gjatë luftës nuk e kam pasur fatin ta takoj asnjërin nga anëtarët e Shtabit të Përgjithshëm”, tha Zhitia, raporton “Betimi për Drejtësi“.
Dëshmitari tha se edhe në libër e kishte potencuar se ky libër përfaqëson vetëm opinionin e tij sa i takon ngjarjeve në Zonën Operative të Llapit dhe se ky opinion nuk është fjalë përfundimtare.
Përpara se të filloi pyetjet avokatja Menegon, në pyetje dëshmitarin e mori prokurorja Silvia D’Ascoli, e cila u fokusua tek libri i dëshmitarit ku kishte përshkruar vizitën e përfaqësuesve të Shtabit të Përgjithshëm të UÇK-së më 18-20 gusht 1998.
Në libër, dëshmitari kishte thënë se delegacioni ishte në përbërje me Hashim Thaçin, Rexhep Selimin, Jakup Krasniqin dhe Bislim Zyrapin, si dhe ata u pritën nga Komandant Remi i shoqëruar nga Fatmir Humolli, Hyzri Talla, Latfi Gashi, Kadri Kastrti, Nuredin Ibishi dhe Sabri Kiçmari.
“Është e rëndësishme me e potencu që në Zonën Operative të Llapit për këtë e kam quajt që u bë zyrtarizmi për faktin se më 18 korrik, komandanti Rrustem Mustafa veç i kishte emëruar këto struktura, këto personalitete në pozita më përgjegjësi. Më 18 korrik këto personalitete ishin emëruar, kështu gjatë vizitës vetëm u zyrtarizuan. Komandant Remi e njoftoi delegacionin e Shtabit të Përgjithshëm me vendimet të cilat i kishte marrë paraprakisht. Kështu që kjo vizitë pavarësisht që unë e kam quajtur si zyrtarizmi dhe zyrtare, të gjitha ato emërime që i kishte bërë më herët komandanti Rrustem Mustafa këto i miratuan ose u miratuan nga ky delegacion dhe sigurisht e kam potencu edhe vendimet që janë marrë. Unë në referencë i kam pas intervistat që i kam bërë me komandant, por edhe literaturë tjetër që e kam shfrytëzu në atë kohë e që kanë qenë si referencë”, tha dëshmitari tutje.
Dëshmitari tregoi se edhe ku i ka mbështetur të dhënat e vendosura në librin e tij.
“Shënimet i kam mbështetur në të dhënat që i kam marrë nga drejtuesit e Zonës Operative të Llapit”, tha ai.
Më pas, prokurorja ia prezantoi dëshmitarit librin e Jakup Krasniqit që fliste për këtë vizitë të delegacionit të Shtabit të Përgjithshëm në Zonën Operative të Llapit.
Duke cituar, D’Ascoli tha se në libër thuhet se shkuarja e këtij delegacioni kishte për qëllim për të përgatitjet e UÇK-së që po bëheshin, të bëheshin emërimet e kuadrit komandues dhe të njoftonin me rrjedhat e luftës në terren.
Dëshmitari tha se e ka lexuar librin në fjalë dhe sipas tij ai ka qenë një prej referencave kryesore sa i takon aspekteve të përgjithshme. Sipas tij, libri i Jakup Krasniqit përputhet me atë se çfarë është duke e thënë ai në sallën e gjykimit.
Gjatë pyetjeve të saj, prokurorja D’Ascoli pyeti dëshmitarin lidhur me disa kode të individëve të cilat veçse ishin përshkruar në librin e tij.
“Si numra nuk i njoh se nuk kemi komuniku gjatë luftës, por si emra i mbajë mend. Si emra ‘Profa’ dhe ‘Azizi’ tjerët nuk i njoh. Nuk e di. Ndoshta i njoh, por si pseudonime nuk i njoh”, tha dëshmitari Zhitia.
Me kodin ‘Profa-20’, dëshmitari tha se ka qenë komandanti i Brigadës 152, Shaban Shala dhe se Azizi ishte me numrin 30.
“E njoh mbas lufte (Azizi) në Forcën e Sigurisë së Kosovës një kohë sa ka qenë dhe më shumë nuk kam informacion për ata. Nuk e kam ditë por gjatë përgatitjes së librit e kam kuptu se çfarë detyre ka pas (gjatë luftës). E kam në librin tim se kur është emëru zëvendëskomandant i Brigadës 152”, tha dëshmitari.
Ai gjithashtu pohoi se Muhamet Latifi ishte nga mbrojtja civile, Salih Mustafa nga njësiti ‘BIA’ dhe Skenderu Murati në sektorin e shëndetësisë të cilën kanë qenë edhe pjesë e strukturës organizative të Zonës Operative të Llapit.
Zhitia: Avokatë dhe prokurorë shkoqitën fjali nga libri im, të cilat në opinion e kanë përcjellë një mesazh të gabuar
(Përditësuar, ora 11:13)- Dëshmitari Skender Zhita gjatë dëshmisë së tij në Hagë, tha se avokatë dhe prokurorë nga Dhomat e Specializuara të Kosovës (DhSK), kanë shkoqitur fjalë dhe fjali nga libri i tij, të cilat në opinion më pas kanë përcjellë mesazh të gabuar.
Këtë deklaratë, dëshmitari e bëri pasi u pyet nga prokurorja Silvia D’Ascoli se a e ka ribotuar ndonjëherë librin e tij, raporton “Betimi për Drejtësi“.
“Po, e kam ribotu në vitin 2023 pa ndryshime. Arsyeja e ribotimit është fakti që nga kjo dhomë, avokatë por edhe prokurorë kanë shkoqitë fjalë dhe e fjali nga tanësia e librit tim, të cilat në opinion e kanë përcjellë një mesazh të gabuar”, tha dëshmitari.
Përpara kësaj, Zhitia u pyet për një pjesë të librit ku përshkruhen ngjarje në Zonën Operative të Llapit nga 24 marsi 1999 deri më 1 maj të vitit 1999.
Ai pohoi se është i saktë informacioni që e ka pasqyruar në libër, ku kishte treguar se pas fillimit të bombardimeve të NATO-s, në Zonën Operative të Llapit kishte filluar ofensiva serbe dhe se Serbia kishte filluar me planin ‘Patkoi’ për dëbimin e shqiptarëve.
“Po, ato të cilat kishin për qëllim dëbimin e popullatës civile nga rajoni i Zonës Operative të Llapit, por është një operacion i bazuar në planin “Patkoi’ të Serbisë në atë kohë i cili filloi me fillimin e bombardimeve të NATO-s dhe ky operacion filloi nga pjesa më veriore e Kosovës, respektivisht nga zona Operative e Llapit. Kështu që u mobilizuan të gjitha njësitë në atë kohë që t’i dalin në ndihmë popullatës për t’u evakuuar dhe larguar nga regjionet të cilat ishin me të rrezikueshme. Pra, tek ‘Patkoi’ kemi çka të shtojmë dhe të themi”, tha Zhitia.
Ndryshe, pranuan në prova materiale faqet e librit të dëshmitarit për të cilat ai u mor në pyetje deri tash. Këto faqe të librit u klasifikuan si prova publike.
Skender Zhitia fillon dëshminë në gjykimin ndaj ish-krerëve të UÇK-së, do të flas për librin e tij
(Përditësuar, ora 10:42)- Në gjykimin ndaj ish-krerëve të Ushtrisë Çlirimtare të Kosovës (UÇK), në seancën e së hënës ka filluar dëshminë dëshmitari i 80-të i Zyrës së Prokurorit të Specializuar (ZPS), Skender Zhitia, i cili mban kodin W4651.
Pyetjet për dëshmitarin i ka filluar prokurorja Silvia D’Ascoli, e cila në përmbledhjen e lexuar për Zhitinë tha se ishte anëtar i UÇK-së si dhe është autori i një libri për UÇK-në, raporton “Betimi për Drejtësi”.
“Skender Zhitia është ish-anëtar i UÇK-së nga Zona Operative e Llapit. Ai u kyç në UÇK në maj 1998. Roli i tij fillestar ishte të mobilizonte civilët dhe ai dha kontribut në krijimin e njësitit “Kështjella 33”. Atje ai ishte komandant dhe që ishte në Brigadën e UÇK-së 151 “Zahir Pajaziti”. Skender Zhitia vazhdoi të qëndronte në UÇK dhe kreu detyra të ndryshme dhe më pas u bë pjesë i TMK-së”, tha D’Ascoli.
Prokurorja tha se Zhitia do të flas për metodologjinë, intervistat dhe burimet e përdorura në librin e tij.
“Skender Zhitia është një këshilltar i lartë në Institutin e Historisë “Ali Hadri” në Prishtinë dhe është autor i librit ‘UÇK-ja: Zona Operative e Llapit’ që është një libër historie nga pikëpamja ushtarake për UÇK-në në atë zonë që është botuar më 2008-ën. Si pjesë e dëshmisë ai shpjegon metodologjinë, burimet e përdorur për të përgatitur këtë libër ku përfshihen intervista, literaturë, ditarë me komandantët dhe luftëtarët e UÇK-së në zonën operative të Llapit”, tha D’Ascoli.
Prokurorja e njoftoi dëshmitarin se nuk do ta marrë në pyetje për gjërat që tashmë i kishte konfirmuar, pasi deklaratat e tij janë pranuar në prova materiale, por që tashmë do të fokusohet në disa pyetje shtesë.
Duke u përgjigjur në pyetjet e prokurores, dëshmitari tregoi se ishte komandant në njësitin K33 në Llugë të Podujevës.
“Po, në përvojën time dhe në detyrat që i kam pasur”, tha dëshmitari, kur u pyet se përshkrimi për K33-shin në libër, a bazohej në përvojat e tij gjatë luftës.
Ndërsa, për njësitë tjera, dëshmitari tha se i ka bazuar nga intervistat dhe bashkëbisedimet që i ka pasur me luftëtarë.
Sipas kryetari të trupit gjykues, Charles Smith III, dëshmia e këtij dëshmitari pritet të zgjasë rreth një ditë e gjysmë, e që dy orë janë paraparë për pyetjet e Prokurorisë dhe rreth pesë orë për kundërpyetjet e mbrojtjes.
Ndërsa, në prova materiale u pranuan të gjitha deklaratat së bashku me materialet përcjellëse në shqip dhe anglisht që dëshmitari i kishte dhënë më herët për ZPS-në.
Trupi gjykues: S’ka urdhër që të monitorohen komunikimet mes të akuzuarve dhe avokatëve
Në Dhomat e Specializuara të Kosovës (DhSK) në Hagë, të hënën, kryetari i trupit gjykues, Charels Smith III njoftoi se nuk ka urdhër për monitorimin e komunikimeve në mes të akuzuarve dhe avokatëve në çështjen gjyqësore ndaj Hashim Thaçit, Kadri Veselit, Rexhep Selimit dhe Jakup Krasniqit.
Po ashtu, Smith III njoftoi se edhe Zyra e Prokurorit të Specializuar ka konfirmuar se nuk ka bërë përgjime të asnjë prej komunikimeve që mbrohen sipas Rregullores së gjykatës, raporton “Betimi për Drejtësi”.
Kjo deklaratë e gjykatësit erdhi gjatë një urdhri gojor në mocionin e përbashkët të mbrojtjes së katër të akuzuarve, të cilin e kishin dorëzuar më 17 qershor për mbrojtjen e privilegjit ligjor.
“Ishte një kërkesë e përbashkët e mbrojtjes për mbrojtjen e privilegjit ligjor… më 28 qershor 2024 u përgjigj prokurori i specializuar dhe mbrojtja nuk u kundërpërgjigj. Më 16 korrik 2024, gjykatësja e vetme lëshoi vendim mbi kërkesën e mbrojtjes për garantimin e mbrojtjes së privilegjit ligjor. Trupi gjykues vëren që në vendimin e 16 korrikut dhe 24 korrikut, gjykatësi i vetëm konfirmoi se nuk kishte bërë monitorimin i komunikimeve të privilegjuara në asnjë formë, as tek vizitat personale, as të telekomunikimit, as të korrespodencës me shkrim dhe as të dokumentacionit në mes të akuzuarve dhe avokatëve të tyre në objektin e paraburgimit. Së dyti; garantojmë mbrojtjen se nuk ka asnjë urdhër për monitorimin e komunikimit të tyre në asnjë formë të akuzuarve në objektin e paraburgimit”, tha Smith III.
Gjykatësi theksoi se tashmë është e qartë që mbrojtja e ka marrë nga organet përkatëse informacionin që duhet të merrte në këto rrethana.
“Trupi gjykues vëren se nuk ka asnjë bazë ligjore për të bërë një garanci të atillë dhe mbrojtja mund të refuzojë një garanci të ngjashme nëse ofrohet në një rast të ngjashëm. Theksojmë se trupi gjykues nuk ka urdhëruar asnjëherë që të përgjohen komunikimet në mes të akuzuarve dhe avokatëve të tyre në objektin e paraburgimit”, tha tutje Smith III.
Kurse urdhri i dytë me gojë kishte të bënte me dëshmitarin Stiven Russell për ndryshimin e një numri të dokumenti që i ishte prezantuar këtij dëshmitari.
Po ashtu, Charles Smith III tha se administratorja do të nxjerrë kalendarin e seancave nga janari deri më 1 maj 2025 në këtë çështje gjyqësore.
Avokatja e Jakup Krasniqit, Venkateswari Alagnedra njoftoi për një bashkë-mbrojtës të ri në ekipin e tyre, e që ishte Shyamala Alagendra.
Kryetari i trupit gjykues njoftoi se të gjithë të akuzuarit janë të pranishëm në sallën e gjyqit.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi
