Edhe zëvendësministri i Pushtetit Lokal, Arbër Vokrri, është fshikëlluar nga politikani serb, Aleksandër Arsenijeviq, në pjesën veriore të Mitrovicës.
Ai ka treguar si ndodhi ngjarja.
“Isha i shoqëruar nga një ekip televiziv, ramë në sy të një grupit të vogël të disa OJQ-istëve që veprojnë në veri, në emër të qytetarëve serbë, që sa herë shfaqet ndonjë zyrtar i lartë i shtetit e kanë bërë zakon të fishkëllojnë,” tha Vokrri.
Vokrri tha se ka kundërshtuar insistimet e tyre që thonë se qeveria bën propagandë, teksa shtoi se protestuesit i ka ftuar për kafe, që të shohin që “jemi shoqëri demokratike”.
“I kundërshtova insistimet e tyre që qeveria jonë bën propagandë se nuk e ka hallin e qytetarëve serbë, i ftova që nëse janë të interesuar ta testojnë se çfarë shoqërie demokratike jemi të vijnë me mua edhe në pjesën jugore me fishkëllimat e tyre të pijmë nga një kafe së bashku.”
Ai e pranoi se Arsenijeviq deshti ta pranojë ftesën, megjithatë nuk u lejua nga Policia, me arsyetimin se mund të provokojë.
“I njoftova se unë dhe kolegët e mi luftojmë për të drejtat tuaja, e jam i lumtur që keni mundësinë e botës që të shfaqni çfarëdo pakënaqësie që keni dhe të mos keni frikë që do t’u ndodhë diçka e keqe,” shtoi Vokrri.
