Veriu.info para pak ditësh ka publikuar një artikull hulumtues në lidhje me dyshimin për favorizim me rastin e shpalljes së fituesit të një tenderi nga Komuna e Mitrovicës në vlerë prej rreth 3 milionë euro për asfaltimin e disa rrugëve në fshatra të Shalës së Bajgorës.
Pikë kritike me rastin e shpalljes fitues të grupit të operatorëve Dio Bes & Eurokos Holding ishte kundërshtimi i anëtarit profesional të Komisionit Vlerësues, Rexhep Hajdari – udhëheqës i sektorit të shërbimeve publike në Drejtorinë për Shërbime Publike të Komunës së Mitrovicës, i cili kishte gjetur se Dio Bes & Eurokos Holding nuk i plotësonin kushtet e dosjes së tenderit sa i përket menaxherit të projektit, udhëheqësit të punishtes dhe referencave për punët e kryera.
Përkundër kundërshtimit të anëtarit të Komisionit, sektori i të cilit është përgjegjës për realizimin e projektit, me rekomandim të dy anëtarëve të tjerë të komisionit që vijnë nga drejtori komunale që nuk kanë të bëjnë fare me punët që do të realizohen përmes këtij projekti, zyrtari përgjegjës i prokurimit, Kushtrim Mehaj, ka shpallur fitues të tenderit grupin e operatorëve Dio Bes & Eurokos Holding.
Veriu.info ka kërkuar qasje në dokumente publike në Komunën e Mitrovicës për të gjitha shkresat e lëndës për këtë tender, por kryetari Faton Peci ka nxjerrë vendim për ofrim të qasjes së kufizuar, pasi zyra e prokurimit, që udhëhiqet nga Kushtrim Mehaj, ka pretenduar se ligjërisht nuk mund të ofrojë qasje të plotë.
Në dokumentet që i janë ofruar portalit Veriu.info, asnjëri prej tyre nuk ka të bëjë me dokumentacionin (diplomat) e menaxherit të projektit e as të udhëheqësit të punishtes. Madje, në dokumentet e ofruara nga zyrtari përgjegjës i prokurimit për Veriu.info nuk janë pjesë as referencat e punëve të kryera nga grupi i operatorëve Dio Bes & Eurokos Holding, të cilat, sipas anëtarit të Komisionit Rexhep Hajdari, nuk janë në përputhje me kërkesat në dosjen e tenderit.
Zyrtari përgjegjës i prokurimit, Kushtrim Mehaj, përmes kërkesës për qasje në dokumente publike, portalit Veriu.info nuk i ka ofruar as raportin e vlerësimit të tenderit, ku tregohen gjetjet që i ka evidentuar anëtari i Komisionit, Rexhep Hajdari, për shkak të të cilave ai nuk është pajtuar që të shpallet fitues grupi i operatorëve ekonomikë Dio Bes & Eurokos Holding. Por këtë raport Veriu.info e ka siguruar nga burimet e veta brenda Komunës së Mitrovicës.
Duke qenë se në këtë raport evidentohen gjetjet e anëtarit të Komisionit, sipas të cilave ai ka thënë se Dio Bes & Eurokos Holding nuk mund të shpallet fitues, kjo mund të jetë arsyeja pse zyrtari përgjegjës i prokurimit nuk na ka dhënë qasje në të njëjtin, të cilin e gjeni të bashkëngjitur KËTU.
Ndryshe, tenderi për asfaltimin e rrugëve në fshatrat Bajgorë, Rashan, Tërstenë, Kutllovc dhe Vllahi që është fitues nga Dio Bes Sh.P.K. dhe Eurokos Holding Sh.P.K. është një projekt që bashkëfinancohet nga Komuna e Mitrovicës dhe Ministria e Infrastrukturës, në krye të së cilës në momentin e shpalljes ishte Hysen Durmishi, shoku dhe ish punëtori i vëllaut të fituesit të tenderit.
(Nesër: Cila është lidhja familjare e anëtarit të Panelit Shqyrtues të OShP-së, që e kishte aprovuar ankesën e Dio Bes & Eurokos Holding, me pronarin e Eurokos Holding?)
