Ish-zëvendësministri i Punëve të Brendshme, Valdet Hoxha thotë se këto janë skenarë të mirë menduara nga presidenti serb Aleksandër Vuçiq.
E, kjo sipas Hoxhës po bëhet vetëm për qëllim të eskalimit të situatës e në fund serbët të paraqiten si viktima.
Kurse, shton se më këtë po dëshirojnë të provokojnë konflikt ndër etnik në Kosovë.
“Tash botërisht po dihet që këto sulme janë të sponsorizuara nga Beogradi dhe këtë e kemi të konfirmuar edhe nga organet e sigurisë së Republikës së Kosovës të cilët para disa ditëve i arrestuan disa shtetas serb me një arsenal të madh ushtarak me potencial të mundshëm për sulm terrorist dhe natyrisht epilogun e rastit ende nuk e dimë, por që këto raste kanë indicie të sulmeve terroriste me të vetmin qëllim eskalimin e situatës për ta provokuar një konflikt ndër etnik në Kosovë dhe natyrisht për ta fajësuar palën kosovare”, është shprehur Hoxha, për Front Online.
I pyetur se a mund të këtë edhe në vazhdim sulme të tilla, Hoxha deklaron se sulmet do të jenë të vazhdueshme, por jo të përmasave siç po dëshiron Beogradi.
“Natyrisht duke e njohur palën serbe dhe metodën e veprimit të tyre do të ketë incidente të natyrës së tillë, do të jenë të vazhdueshme, por që prandaj po e vë theksin te koordinimi i ngushtë i mekanizmave të sigurisë së shtetit të Kosovës me partnerët ndërkombëtar që ne të mos biem në grackën e këtyre skenarëve të mirë menduar dhe mos të shihemi nga partnerët ndërkombëtar si palë e cila po kontribuon në eskalim të situatës”, ka shtuar ai.
Thotë se nuk dihet se kur mund të shtensionohet situata në veri, pasi që në atë pjesë po ndodhin situata të paparashikuara.
“Një përfundim me afat kohor të qartë besoj nuk e kanë as ndërkombëtarët sepse po ndodhin situata të paparashikuara sepse vlerësoj që veriu i vendit tashmë me dashje ose pa dashje është ndërlidh edhe me situatën gjeopolitike, dhe prandaj edhe mendoj unë dhe vlerësoj që edhe epilogu i bisedimeve Kosovë-Serbi varet nga përfundimi dhe rrjedha e luftës në Ukrainë”, ka deklaruar Hoxha.
