Pas paralajmërimeve të Bashkimit Evropian për masa ndaj Kosovës nëse nuk deeskalohet situata në veri të vendit, ka folur për “Gazeta Blic” nënkryetari i LDK-së, Lutfi Haziri.
Haziri ka thënë se kryeministri Kurti duhet të ndërmarrë tashmë urgjentisht këto tri veprime për të parandaluar sanksionet.
Ai ka thënë se duhet të bëhet deeskalimi i situatës, të caktohen zgjedhjet në katër komunat veriore dhe të bëhet draftimi i statutit të Asociacionit.
“I vetmi veprim që kryeministri Kurti duhet të bëjë është deeskalimi i situatës në veri, caktimi i zgjedhjeve sipas kërkesës dhe draftimi i statutit të Asociacionit.Ky është pani evropian tani e disa muaj që i kërkohet Kosovës” tha Haziri për “Gazeta Blic”.
Bashkimi Evropian ka disa ditë që ka paralajmëruar masa ndëshkuese ndaj Kosovës për shkak të situatës së tensionuar në veri të vendit.
Masat parashikohen të jenë politike e financiare.
Disa nga masat që pritet të sanksionohet Kosova janë: Pezullimi I punës të të gjitha grupeve punuese për Marrëveshjen e Stabilizim Asociimit (MSA), pezullimin e financimit të programeve të BE-së, mosmiratimin e projekteve nga Fondi për investim në Ballkanin Perëndimor si dhe pezullimin e takimeve në nivele politike.
Tensionet në veri te Kosovës, të banuar me shumicë serbe, nisën më 26 maj, kur kryetarët e rinj shqiptarë të Zveçanit, Zubin Potokut dhe Leposaviqit, hynë në ndërtesat komunale nën përcjelljen e Policisë së Kosovës.
Serbët kundërshtuan këtë dhe që atëherë po zhvillojnë protesta duke kërkuar tërheqjen e kryetarëve të rinj dhe të njësive speciale policore.
Bashkësia ndërkombëtare i ka paraqitur Kurtit tri kërkesa kryesore: qetësimin e situatës në veri, mbajtjen e zgjedhjeve të reja në katër komunat veriore dhe rikthimin në dialogun për normalizimin e raporteve Kosovë-Serbi.
Ndërkaq, nga Beogradi është kërkuar që të sigurojë që serbët të marrin pjesë pa kushte në zgjedhjet eventuale lokale.
