Kryetari i PDK-së, Memli Krasniqi, ka reaguar pas takimit të sotëm në Bruksel, ku tha se Kurti tek sot e ka kuptuar që në Bruksel e Ohër ka pranuar një marrëveshje dhe një aneks, përmes të cilave ka hequr dorë nga njohja e ndërsjellë.
Krasniqi tha se në situatën e qëndrimit refuzues si pasojë e pranimit paraprak, Kurti e ka futur veten vet dhe se sipas tij, askush s’e ka detyruar të pranojë marrëveshjen dhe aneksin e zbatimit.
“Tash, pasi e ka kuptuar se ka gabuar, ka vendosur të bëjë lojëra fjalësh dhe hapa mbrapa. Fatkeqësisht, ky ndryshim i qëndrimit nuk do t’i kushtojë atij, por Kosovës. Kosova dhe qytetarët e saj nuk i kanë borxh asgjë Kryeministrit Kurti – aq më pak sanksionet të cilat tashmë po i vuajmë dhe të tjera që janë paralajmëruar”.
“Një gjë është e qartë: Serbia gjithmonë ka qenë destruktive, duke sulmuar jo vetëm shtetin e Kosovës, por edhe aleatët tanë për mbështetjen e vazhdueshme ndaj nesh. Por sot, për fatin tonë të keq, me këtë Kryeministër është Kosova ajo që po vihet në thumb të kritikës ndërkombëtare, derisa Serbia po lirohet nga presioni. Faktet janë këto, ndërsa deklaratat e Kryeministrit Kurti janë vetëm arsyetime”, tha Krasniqi.
Tutje, Krasniqi tha se thirrjet populiste për t’u bashkuar kundër perëndimit dhe botës demokratike në një shtet që ka synim integrimin euroatlantik është çmenduri e llojit të vet.
“Qytetarëve dhe shtetit tonë nuk i duhet e nuk i ndihmon ky kurs i konfrontimit me aleatët strategjikë. Sot, para se gjithash, Kosova ka nevojë për një Qeveri tjetër – kredibile, të aftë dhe të përgjegjshme, e cila e rikthen vendin në kursin e nevojshëm të zhvillimit dhe integrimit euro-atlantik”, tha ai.
Postimi i plotë:
