Policia e Kosovës është duke kryer një bastisje në një depo tregtare në fshatin Soçanicë të Leposaviqit, njofton “Mitropol”.
Arsyeja e bastisjes është dyshimi se në këtë depo ka mallra të kontrabanduara dhe pa dokumentacion, mëson “Mitropol”.
Këtë bastisje e konfirmoi për “Mitropol” edhe zëvendës komandanti i PK-së për rajonin e Veriut, Veton Elshani.
“Dyshojmë se në magazinën në fjalë ka mallra që janë kontrabanduar dhe nuk kanë dokumentacion. Policia po kontrollon këtë depo për momentin dhe në rast se ka mallra të kontrabanduara në bastisje do përfshihet edhe dogana”, ka thënë Elshani për “Mitropol”.
Tregu i bastisur është biznes i regjistruar në ARBK.
Prandaj, Policia e Kosovës thotë se kur ndërhyhet në kompanitë e regjistruara në sistemin e Kosovës, atëherë objekt i përpunimit janë vetëm mallrat që nuk kanë dokumentacion shoqërues dhe nuk janë të regjistruara.
Nga ana tjetër, kur ndërhyhet në kompani të pa regjistruara, atëherë i gjithë malli që gjendet në vend i nënshtrohet përpunimit dhe konfiskimit, dhe jo rrallë ndaj personave përgjegjës për mallin nis procedura hetimore.
Elshani konfirmoi për “Mitropol se për momentin nuk ka të arrestuar nga aksioni në fjalë.
