Qeveria Kurti gjatë fushtës zgjedhore të vitin 2021 kishte premtuar ndërtimin e 4.000 njësive banesore.
Sipas programit të saj, familjet përfituese do të bëheshin pronare të banesave me këste mujore prej vetëm 120 deri 150 euro në muaj, për një periudhë prej 150 muajsh.
Përparësi do të kishin çiftet e reja, të cilat kanë mundësi të limituara financiare për të blerë banesa me çmime të tregut.
Ndonëse kanë kaluar më shumë se tri vjet prej se ky premtim është bërë formal, ndërtimi i këtyre banesave nuk ka filluar.
Kryeministri Kurti kishte thënë aso kohe se projekti do të realizohet sa më shpejt të jetë e mundur.“Si Qeveri do ta bëjmë të pamundurën që projekti i planifikuar për ndërtimin e 4.000 njësive banesore, të realizohet sa më shpejt që është e mundur”.
Madje ai thoshte se këto banesa nuk do i lënë çiftet e reja të ikin jashtë vendit.
“Banesat për çiftet e reja janë tejet të rëndësishme në mënyrë që të mos ikë rinia”, kishte thënë Kurti.
Për opozitën, ky premtim ka qenë mashtrues dhe se ka pasur për qëllim vetëm mbledhjen e votave. Sipas tyre, ky premtim po i bënë të rinjtë të ndihen të mashtruar dhe po ikin nga Kosova.
Haxhiu: Kurti i ka mashtruar çiftet e reja për banesa, si pasojë ata po ikin jashtë vendit
Bekim Haxhiu, anëtar i Komisioni Parlamentar për Shëndetësi dhe Mirëqenie Sociale, lidhur me premtimit e Qeverisë “Kurti” për sigurimin e banesave për çiftet e reja thotë se ka qenë thjesht mashtrim për të siguruar vota dhe asgjë më shumë.
“Ky ka qenë vetëm një mashtrim elektoral mashtrues i Kurtit, asgjë më shumë. Asnjë hap nuk është bërë për këto tri vite e gjysmë të Qeverisë. Ka qenë një prej premtimeve mashtruese të kryeministrit, sikur edhe shumë premtime të tjera”, tha ai.
Haxhiu thotë se ky premtim ka pasur për qëllim vetëm sigurimin e votave, dhe se pas mashtrimit çiftet e reja po detyrohen të ikin jashtë vendit
“Nëpërmjet këtij mashtrimi është munduar Kurti të fitoj vota e rinisë apo çifteve të reja të cilët kanë nevojë për të siguruar çështjen e banimit por nuk është bërë asgjë në këtë pjesë. Ua ka marrë votat, i ka mashtru rininë, i ka mashtruar edhe ata tash po detyrohen me ikë jashtë vendit sepse e kanë kuptuar që kanë qenë të mashtruar prej Albin Kurtit”, tha Haxhiu.
Manaj: Premtimi për banesa, njëri nga mashtrimet që i është bërë qytetarëve nga VV në fushtën zgjedhore
Shkëmb Manaj nga LDK thotë se premtimi i Lëvizjes Vetëvendosje për ndërtimin e banesave për çiftet e reja mbetet vetëm një mashtrim që u është bërë qytetarëve të Kosovës.
‘’Është njëri nga mashtrimet që i është bërë qytetarëve nga VV në fushtën e tyre zgjedhor’’, shprehet ai.
Ai deklaron se tashmë Qeveria e Kosovës është në përfundim e sipër të mandatit të saj, por që nuk ka asnjë veprim konkret për realizimin e premtimit electoral për ndërtimin e këtyre banesave.
“Po përfundon mandati i plotë i kësaj Qeverie dhe nuk kanë marr veprime konkrete për realizimin e premtimit elektoral për masën e banimit të përballueshëm’’ kishte thënë Manaj.
Banesat për çiftet e reja, Dreshaj: Veç premtim i Kurtit, përdoret për kampanjë zgjedhore
Shemsedin Dreshaj nga AAK-ja thotë për “Front Online” se premtimi i Kurtit lidhur me banesat për çiftet e reja është thjesht premtim.
Dreshaj si anëtar i Komisionit për Shëndetësi dhe Mirëqenie Sociale thotë se nuk kanë marrë ndonjë ligj apo nëndraft për të debatuar lidhur me këtë çështje.
“Ky është vetëm njëri nga premtimet e kësaj Qeverie. Deri më sot nuk kemi asnjë informatë për ndonjë iniciativë në raport me këtë premtim. Pra, nuk ka asnjë ligj apo nëndraft që ka ardhur deri më sot për tu debatuar qoftë në Komision për Shëndetësi dhe Mirëqenie Sociale ose edhe në Kuvend”, tha ai.
Por se a mundet të filloj një projekt i tillë gjatë këtij mandati, Dreshaj thotë se praktikisht është e pamundur dhe se një gjë e tillë mund të përdoret vetëm për kampanjë zgjedhore.
“Kjo praktikisht është e pamundur, tash jemi në vitin zgjedhor, fillojnë pushimet verore dhe mendoj që nuk do të rezultoj as edhe një iniciativë më e vogël në këtë drejtim. Mundet eventualisht ndonjë potez politik në raport me kampanjën zgjedhore por diçka më tepër nuk pres”, tha Dreshaj për Front Online.
