Aktakuza e rastit “Banjska”, e cila akuzon 45 persona fizik e juridik, nxjerr në dritë detaje tronditëse për financimin e sulmit terrorist të 24 shtatorit 2023 në Banjskë të Zveçanit.
Një kompani biznesore, e cila ka përfituar tenderë publikë në Kosovë, figuron pjesë e grupit terrorist, bazuar në aktakuzën për rastin “Banjska” të cilën e ka ngritur të mërkurën Prokuroria Speciale
“RAD” D.O.O., e cila është fuqizuar edhe përmes tenderëve publikë të fituar nga institucionet publike në Kosovë mes viteve 2018-2021 dhe pronari i saj Radulle Steviq, janë pjesë e listës së të akuzuarve.
Kompania dhe Steviq si drejtor i saj dyshohen se kanë kryer shpëlarjen e parave me burim nga aktiviteti kriminal i Millan Radoiçiqit, udhëheqësit të grupit terrorist, thuhet në aktakuzën e Prokurorisë Speciale, të cilën e ka publikuar të mërkurën portali “Nacionale”.
Paratë e shpëlara përmes kompanisë “RAD” D.O.O. dyshohet se janë përdorur për financimin e sulmit terrorist në Banjskë.
“Nga data 01.01.2017 deri më datë 24.09.2023, i pandehuri Milan Radoiçiq duke e ditur se një pjesë e të hyrave e tij burojnë nga aktiviteti kriminal i përcaktuar si në pikën III të dispozitivit dhe aktivitetit tjetër kriminal, përmes bashkëpunimit dhe ndihmës së të\ pandehurit Radule Stević – pronar dhe person përgjegjës i bizneseve RAD D.O.O dhe Radule Stevic B.I dhe aktivitetit ekonomik të tyre, këto para i ka konvertuar në pasuri të paluajtshme dhe të luajtshme”, thuhet në aktakuzën e Prokurorisë Speciale.
“[…] ku një pjesë të pasurive të paluajtshme e ka transferuar dhe tek personat e tretë, me qëllim të fshehjes ose maskimit të burimit të pasurisë”, thuhet në aktakuzë.
Kësisoj, prokurori special Naim Abazi i akuzon Radoiçiqin, Steviqin dhe personin juridik “RAD” D.O.O. për shpëlarje të parave.
Pjesë nga aktakuza ndaj 45 personave për rastin ‘Banjska’
“Nga data 01.01.2017 deri me datë 24.09.2023, i pandehuri ‘RAD’ D.O.O. në cilësinë e personit juridik të menaxhuar nga i pandehuri Radule Steviq, në cilësi të pronarit përgjegjës, duke e ditur se pasuria e të pandehurit Milan Radoiçiq buron nga akitiviteti kriminal, përmes ushtrimit të aktivitetit ekonomik, ka bashkëpunuar dhe ndihmuar të pandehurin Millan Radoiçiq për të konvertuar pasurinë e tij, me qëllim të fshehjes ose maskimit të burimit të pasurisë”, thuhet në aktakuzë.
Kompania “RAD” D.O.O., në pronësi të Radulle Steviqit, të sanksionuarit nga Shtetet e Bashkuara të Amerikës, ka fituar gjithsej 61 tenderë në vlerë prej 5.6 milionë eurosh. Këto projekte janë financuar nga buxheti i Qeverisë së Kosovës.
Tenderët publikë, kjo kompani i kishte përfituar nga gushti i vitit 2018 e deri në shtator të vitit 2021. Shumica e tenderëve publikë ishin dhënë nga komunat veriore të udhëhequra asokohe nga Lista Serbe, si dhe një tender nga Ministria e Infrastrukturës.
Ministria e Infrastrukturës, e udhëhequr nga Liburn Aliu, në muajin korrik të vitit 2021, para se Radulle Steviq të vendosej në Listën e Zezë të ShBA-ve, i kishte dhënë një tender të vlefshëm afërt 600 mijë euro një konsorciumi në të cilin ishte pjesë kompania “RAD” D.O.O..
Tenderi ndërlidhej me punë për mirëmbajtjen e rrugëve nacionale dhe rajonale.
Në dhjetor të vitit 2021, kur Departamenti Amerikan i Shtetit e vendosi Steviqin në listën e saj të sanksioneve, ministri Liburn Aliu tha se kompania e Steviçit nuk ishte listuar më parë në listën e zezë nga institucionet e Kosovës.
Kësisoj, kishte thënë Aliu në një konferencë për media, kompanisë së lidhur me Millan Radoiçiqin, i ishte bërë e mundur fitimi i tenderit për mirëmbajtjen e rrugëve.
“Kjo kompani ka marrë tenderë edhe më herët. Nuk ka qenë asnjëherë në listë të zezë. Pra, ligjërisht për mos me e lanë mos me e marrë tenderin këtë kompani, nuk ka pasur mundësi sepse nuk kanë figuruar në atë listë të zezë. Por, ne jemi duke e marrë shumë seriozisht këtë çështje”, kishte thënë Aliu, raporton Paparaci.
Brenda disa ditës, po ashtu në dhjetor të atij viti, Aliu kishte njoftuar në rrjetin social Facebook se kompanisë “RAD” D.O.O. i ishte ndërprerë kontrata për mirëmbajtjen e rrugëve.
Prokuroria Speciale e Kosovës njoftoi të mërkurën se ka ngritur aktakuzë ndaj 45 personave – në mesin e tyre edhe Millan Radoiçiq e Radulle Steviq – për sulmin e armatosur në Banjskë.
Të përfshirët, sipas prokurorit të rastit, Naim Abazi, kanë pasur role të ndryshme brenda grupit të tyre kriminal.
Përpos shpëlarjes së parave, Millan Radoiçiq akuzohet edhe për lehtësim dhe financim të terrorizmit, si dhe për vepra të rënda kundër rendit kushtetues të Republikës së Kosovës.
