I dyshuari për keqpërdorim të detyrës, sekretari i përgjithshëm i Ministrisë së Mjedisit, Planifikimit Hapësinor dhe Infrastrukturës, Izedin Bytyqi, me dy vendime, dyshohet se i ka shkaktuar buxhetit të Kosovës dëme mbi 5 milionë euro.
Në dosjen e Prokurorisë që e ka siguruar gazeta Paparaci, shtjellohet edhe mënyra e përllogaritjes së borxhit të dy kompanive “Frutex” dhe “Frutti”.
Në dosje thuhet se vendimi financiar i datës 11 mars 2022, është vërtetuar se i pandehuri Bytyqi në cilësinë e Sekretarit të Përgjithshëm, ka nënshkruar këtë vendim me të cilin përllogaritja e detyrimit financiar për operatorin ekonomik “Frutex”, i cili si aktivitet ka prodhimin dhe ambalazhimin e lëngjeve freskuese, për periudhën kohore prej muajit korrik 2019 deri në dhjetor 2021, është në shumën 127.90 euro.
I pandehuri Izedin Bytyqi në shkelje të detyrave zyrtare dhe si rezultat i përllogaritjes së borxheve në mënyrë të kundërligjshme të disa operatorëve ekonomik, në muajin dhjetor të vitit 2023, i ka mundësuar që operatorit ekonomik “Frutti” vazhdimin e lejes ujore pa i plotësuar kushtet ligjore dhe në kundërshtim me kriteret e caktuara në lejet paraprake.
“Dhe këtë e ka arritur pasi që është ushtruar presion tek zyrtarët e MMPHI-së, B.B dhe M.K, të caktuara për të shqyrtuar kërkesat për vazhdimin e lejeve ujore, e të cilat janë kërcënuar nga Naser Hafizi se po që se nuk do të vepronin sipas kërkesave të tij, do të inicionte procedura disiplinore për largim nga puna”, thuhet në dosjen që ka siguruar Paparaci.
I pandehuri ka keqpërdorur detyrën zyrtare, me dashje ka tejkaluar kompetencat e tij, ashtu që gjatë vitit 2022-2023 ua ka mundësuar përfitimin e kundërligjshëm prej 10 për qind të pagës për punë të kryera brenda orarit të punës zyrtareve B.B dhe M.K, të cilat nën presionin e të pandehurit Naser Hafizi kanë përgatitur dosjet e Operatorëve Ekonomikë dhe kanë hetuar vendimet e kundërligjshme, për zvogëlimin e borxheve dhe vazhdimin e lejeve ujore ani pse operatorët ekonomik nuk kanë plotësuar kriteret e kërkuara.
“Vetëm në këto raste, shuma e dëmit që i është bërë Autoritetit Rajonal të Pellgjeve Lumore, respektivisht buxhetit të Republikës së Kosovës vlerësohet të jetë mbi 5 milionë euro”, thuhej në dosje.
