Pas publikimit të artikullit, përmes një komenti ka reaguar drejtori i Drejtorisë së Shëndetësisë në Komunën e Mitrovicës, Fahri Shabani, ku në tentim për të mbuluar skandalin e tij, ai hedh akuza ndaj gazetës Veriu.info ka prezantuar asnjë fakt të vetëm.
Sidoqoftë, ai kishte vazhduar tutje duke thënë se projekti i Avicena KS në kuadër të fushatës: “Lufto me guxim -Muaji i ndërgjegjësimit kundër kancerit te gjirit” implementohet si marrëveshje bashkëpunimi në mes të Avicena KS dhe të gjitha Drejtorive të Shëndetësisë së Komunave të Kosovës”. Pra, sipas tij, Drejtoritë e Shëndetësisë të të gjitha komunave të Kosovës kanë marrëveshje bashkëpunimi me “Avicena KS” për muajin e ndërgjegjësimit kundër kancerit të gjirit.
Pa u bërë 24 nga ky pretendim i tij, Veriu.info ka zbuluar se kjo është veç një rrenë e madhe e thënë publikisht nga drejtori Fahri Shabani. Kjo ishte dëshmuar nga përgjigja që kemi marrë dje nga zyra për informim të Komunës së Vushtrrisë, e cila sikurse Mitrovica udhëheqet nga PDK-ja dhe që të dy drejtorët e shëndetësisë janë nga PDK-ja, duke i pyetur se a ka te lidhur marrëveshje apo memorandum bashkëpunimi Drejtoria e Shëndetësisë (Komuna e Vushtrrisë) me “Avicena KS” e kishte mohuar se ka marrëveshje të tillë.
Në përgjigjen e dërguar nga zyrtarja për informim e Komunës së Vushtrrisë, Mirjeta Duraku, thuhej: “Sipas informatave të marra nga Drejtoria për Shëndetësi dhe Përkujdesje Sociale, ju njoftojmë se Komuna e Vushtrrisë nuk ka marrëveshje me laboratorin në fjalë.”
Për të vërtetuar se a është i vërtetë pretendimi i drejtorit të Drejtorisë së Shëndetësisë të Komunës së Mitrovicës, Fahri Shabani, se “Avicena KS” ka marrëveshje me të gjitha komunat për fushatën “Lufto me guxim -Muaji i ndërgjegjësimit kundër kancerit te gjirit”, Veriu.info ka marrë përgjigje edhe nga Komuna e Prizrenit dhe Komuna e Skenderajt, ku që të dy këto komuna që udhëheqen nga PDK-ja sikur Mitrovica, e kanë mohuar ekzistimin e marrëveshjeve mes tyre dhe “Avicena KS”.
Në një prononcim për Veriu.info, drejtori i Drejtorisë së Shëndetësisë në Komunën e Prizrenit, Simir Krasniqi ka thënë: “Sa i përket pyetjes ju njoftoj se Drejtoria e Shëndetsisë nuk ka lidhur kurrfarë marrëveshje apo bashpunimi me ‘Avicena KS’”.
Të njëjtën përgjigje e ka kthyer edhe Amir Lushtaku, Udhëheqës i për Komunikim me Publikun në Komunën e Skenderajt, i cili ka thënë: “Komuna e Skenderajt nuk ka lidhur ndonjë kontratë të tillë me Avicena KS.”
Pra, pretendimi i Drejtoritë të Drejtorisë së Shëndetësisë në Komunën e Mitrovicës, Fahri Shabani, se ka lidhur marrëveshje me “Avicena KS” për arsye se edhe gjitha komunat tjerë kanë një marrëveshje të tillë, është dëmantuar si pretendim nga Komuna e Prizrenit, Vushtrrisë dhe Skenderajt.
Ndryshe, laboratori dhe politiklinka “Avicena KS” e bastisur në Mitrovicë nga nga Drejtoria për Hetimin e Krimeve Ekonomike dhe Korrupsionit e Policisë së Kosovë nën dyshimin për falsifikim të dokumenteve dhe ushtrim të kundërligjshëm të veprimtarisë mjekësore dhe farmaceutike, është vetëm rreth 5-6 metra larg nga oborri i Komunës së Mitrovicës.
Veriu.info ka kërkuar qasje ne dokumente zyrtare për marrëveshjen në fjalë nga Komuna e Mitrovicës, e cila është zotuar se brenda afatit ligjor do të na jep qasje.
