Kryeministri Albin Kurti ka qëndruar në Pejë së bashku me ministrin e Administrimit të Pushtetit Lokal, Elbert Krasniqi. Ata janë takuar me mbështetës e bashkëpunëtorë të subjektit të Iniciativës së Re Demokratike të Kosovës dhe me komunitetin egjiptian.
“Bashkë me IRDK-në kemi qeverisur në këtë mandat, duke garantuar që komuniteti egjiptian të jetë i përfaqësuar në institucione dhe në role vendimmarrëse duke dhënë një kontribut të jashtëzakonshëm në progresin dhe zhvillimin e vendit”, ka shkruar Kurti në Facebook.
Kurti ka theksuar se për komunitetet joshumicë kanë ndarë grante për fermerë, kanë rindërtuar e rinovuar shtëpi, ndarë mjete për arsim, subvencionuar energjinë, përkrahur të rinjtë, mbështetur familjet, investuar në infrastrukturë e kulturë etj.
“Me IRDK-në dhe me Kryetarin Krasniqi, bashkëpunimi ka qenë i shkëlqyer dhe angazhimi i frytshëm e rezultativ në shërbim të qytetarëve dhe posaçërisht komunitetit egjiptian. Vazhdojmë drejt punëve të mbara e sukseseve të përbashkëta”, ka shkruar kryeministri.
