Punësimet mbi baza partiake vazhdojnë të jenë pothuajse përditëshmëri në Qeverinë e Albin Kurtit, ku ministra e deputetë vazhdojnë të rehatojnë në pozita të rëndësishme anëtarë të partive të tyre e familjarë.
Një rast i tillë ka ndodhur sërish në Ministrinë e Bujqësisë ku një anëtar i listës “Guxo” është përzgjedhur në pozitën “Inspektor i Tokës Bujqësore” në Agjencinë për Zhvillimin e Bujqësisë në kuadër të kësaj ministrie.
Shkumbin Hamza, anëtar i partisë “Guxo” të drejtuar nga ministri Faton Peci, është rehatuar në këtë pozitë nga institucioni që kryetari i partisë së tij drejton.
Gazeta Online Veriu.info ka siguruar njoftimin e Agjencisë për Zhvillim Bujqësor me listën e kandidatëve që janë përzgjedhur, ku në mesin e tyre është edhe Shkumbin Hamza nga Prizreni i cili mban pozitën e sekretarit administrativ në zyrën e listës “Guxo” në Prizren.
Siç shihet edhe nga njoftimet e deputetit të listës “Guxo” Haxhi Avdyli, Shkumbin Hamza ishte sekretar administrativ i zyrës së partisë në Prizren.
Më poshtë ju sjellim edhe fotografitë e zyrtarit të listës “Guxo” në Prizren, Shumbin Hamza:
Kujtojmë që përveç punësimeve, ministria e drejtuar nga Faton Peci po akuzohet edhe për dhënien e grantit prej rreth 100 mijë euro për vëllain e deputetes Fitore Pacolli dhe këshilltarit të tij Naim Huruglica.
